امت نیوز ڈیسک //
جموں، 19 جولائی: جموں و کشمیر کے وزیر اعلیٰ عمر عبداللہ نے شدید بارشوں اور جموں ڈویژن میں پیدا ہونے والی سنگین صورتحال کے پیش نظر اپنا دہلی کا دورہ مختصر کرتے ہوئے آج دوپہر جموں روانہ ہونے کا اعلان کیا ہے تاکہ زمینی صورتحال کا خود جائزہ لے سکیں۔
راجوری سمیت جموں ڈویژن کے کئی علاقوں میں موسلا دھار بارش کے باعث اچانک سیلاب آ گیا، جس سے نشیبی علاقے زیر آب آ گئے اور سیکڑوں افراد کو محفوظ مقامات پر منتقل کرنا پڑا۔
سوشل میڈیا پلیٹ فارم "ایکس” پر جاری بیان میں وزیر اعلیٰ نے کہا کہ وہ صبح سویرے سے صورتحال پر مسلسل نظر رکھے ہوئے ہیں اور متعلقہ علاقوں کے مقامی ارکانِ اسمبلی سے رابطے میں ہیں۔ انہوں نے کہا کہ حکومت کی اولین ترجیح انسانی جانوں کا تحفظ ہے اور بارشوں و سیلاب سے متاثرہ خاندانوں کو ہر ممکن امداد اور تعاون فراہم کیا جائے گا۔
عمر عبداللہ نے یہ بھی واضح کیا کہ 20 جولائی کو دہلی میں ریاستی درجہ کی بحالی کے مطالبے کے لیے نیشنل کانفرنس کا مجوزہ احتجاج اپنے مقررہ پروگرام کے مطابق پارٹی صدر ڈاکٹر فاروق عبداللہ کی قیادت میں منعقد ہوگا۔
