امت نیوز ڈیسک //
جموں: جموں و کشمیر کے ضلع پونچھ میں شدید بارشوں اور لینڈ سلائیڈ کے باعث ایک اور دل دہلا دینے والا سانحہ پیش آیا، جہاں لوران علاقے میں مٹی سے بنا ایک مکان لینڈ سلائیڈ کی زد میں آ گیا، جس کے نتیجے میں دو معصوم بچوں سمیت سات افراد جاں بحق ہوگئے۔
حکام کے مطابق یہ واقعہ پیر کے روز پونچھ کے بالائی علاقے لوران میں پیش آیا۔ لینڈ سلائیڈ کے باعث مکان ملبے تلے دب گیا، جس سے گھر میں موجود افراد جانبر نہ ہو سکے۔ جاں بحق ہونے والوں میں چار خواتین، چار سالہ عدنان رفیق اور دو سالہ ارزا بھی شامل ہیں۔ دیگر متوفیان کی شناخت زیدہ بیگم، شمیم اختر، تنویر، عرفان اور صبینہ کے طور پر ہوئی ہے۔
ریسکیو ٹیموں نے فوری طور پر امدادی کارروائیاں شروع کر دیں۔ حکام کے مطابق متعدد افراد ملبے تلے دب گئے تھے اور لاشوں کی تلاش کا عمل جاری ہے۔
یہ سانحہ ایسے وقت پیش آیا ہے جب ایک روز قبل ہی پونچھ اور راجوری اضلاع میں موسلادھار بارشوں کے باعث آنے والے اچانک سیلاب اور لینڈ سلائیڈ کے نتیجے میں کم از کم 17 افراد جان کی بازی ہار گئے تھے، جبکہ کئی افراد اب بھی لاپتہ ہیں۔ پیر کے روز ڈوڈہ ضلع میں پتھر گرنے کے ایک واقعے میں دو مزید افراد کی ہلاکت کے بعد بارش سے متعلق مختلف حادثات میں مجموعی اموات کی تعداد 26 ہو گئی ہے۔
دریں اثنا وزیرِ اعلیٰ عمر عبداللہ نے بارش اور لینڈ سلائیڈ سے جاں بحق ہونے والے ہر فرد کے لواحقین کے لیے 6 لاکھ روپے کی مالی امداد کا اعلان کیا ہے۔ اس امدادی رقم میں 4 لاکھ روپے اسٹیٹ ڈیزاسٹر ریسپانس فنڈ (SDRF) اور 2 لاکھ روپے وزیرِ اعلیٰ ریلیف فنڈ (CMRF) سے فراہم کیے جائیں گے۔
حکام نے متاثرہ علاقوں میں ریسکیو اور امدادی کارروائیاں تیز کر دی ہیں، جبکہ مسلسل بارشوں کے باعث لوگوں کو احتیاط برتنے کی ہدایت کی گئی ہے۔
