امت نیوز ڈیسک //
شوپیاں: پہاڑی ضلع شوپیاں کے چیک کیلر علاقے میں فوج نے دو عسکریت پسندوں کے معاون کو اسلحہ و گولہ بارود سمیت حراست میں لینے کا دعویٰ کیا ہے۔
دفاعی ترجمان نے بتایا کہ مصدقہ اطلاع موصول ہونے کے بعد سکیورٹی فورسز نے چیک کیلر کے نزدیک ناکہ لگایا جس دوران گاڑی میں سوار دو افراد کو رکنے کا اشارہ کیا گیا۔ انہوں نے بتایا کہ ناکہ پارٹی کو دیکھتے ہی گاڑی میں سوار افراد نے فرار ہونے کی کوشش کی تاہم فوج نے پیشہ وارانہ صلاحیتوں کو بروئے کار لا کر دونوں کو زندہ گرفتار کیا۔
فوجی ترجمان کے کہا کہ جامہ تلاشی کے دوران گرفتار شدگان کے قبضے سے کچھ اسلحہ وگولہ بارود برآمد کرکے ضبط کیا گیا۔گرفتار شدگان کی شناخت گوہر منظور اور عاقب حسین ساکن دربگام پلوامہ کے بطور ہوئی۔ انہوں نے بتایا کہ دونوں کو پولیس کے حوالے کیا گیا۔ وہیں پولیس نے گرفتارشدگان کے خلاف کیلر پولیس اسٹیشن میں کیس درک کرکے تفتیش شروع کی۔
بتادیں کہ گزشتہ روز پولیس نے شوپیان میں ایک سرگرم عسکریت پسند کو گرفتار کرنے کا دعویٰ کیا ہے ۔ ذرائع کے مطابق فوج کی 44 راشٹریہ رائفلز سی آر پی ایف کی 178 بٹالین اور جموں و کشمیر پولیس نے محند پورہ ترینج علاقے میں ایک ناکہ چیکنگ کے دوران ایک سرگرم عسکریت پسند عادل احمد ڈار ولد عبدل غنی ڈار ساکنہ ترینج شوپیاں کو ہتھیار سمیت گرفتار کرلیا ہے۔
