امت نیوز ڈیسک //
سرینگر:جموں کشمیر کی ایک عدالت نے ٹریفک پولیس حکام کو حکم جاری کرتے ہوئے ہدایت جاری کی ہے کہ وہ ای چالان سے جرمانہ عائد کرنا بند کریں، جب تک اس (ای چالان) سسٹم میں تکنیکی خرابیوں کو دور نہ کیا جائے۔ عدالت نے ٹریفک پولیس کو ہدایت دی ہے کہ ای چالان کے ذریعے جتنی بھی گاڑیوں کو ضبط کیا گیا ہے انکو فوری طور بغیر جرمانہ کے ریلیز کیا جائے۔
یہ ہدایت ٹریفک پولیس کو آج سرینگر کے سپیشل موبائل مجسٹریٹ نے اس وقت جاری کی جب ایک درخواست کنندگان نے عدالت میں عرضی دائر کی تھی کہ سرینگر میں ٹریفک پولس نے بغیر کسی وجہ یا ٹریفک رولز کی خلاف ورزی کے ای چالان کیا ہے۔ عدالت نے اس عرضی میں تفصیلات کی سنوائی کے بعد ٹریفک پولیس کو حکم جاری کیا کہ ’’جب تک ای چالان میں تکنیکی خرابیوں کو صحیح نہیں کیا جائے گا تب تک پولیس ای چالان کا سلسلہ بند کرے۔‘‘
عدالت نے ایس ایس پی ٹریفک، مظفر احمد شاہ، کو ہدایت دی کہ درخواست کنندگان کا جرمانہ واپس ادا کیا جائے اور ای چالان کے ذریعے ضبط کی گئی گاڑیوں کو فوراً ریلیز کیا جائے۔ عدالت نے انسپکٹرز جنرل آف ٹریفک پولیس کو بھی حکم جاری کرتے ہوئے کہا کہ ای چالان میں درستی لانے کے بعد ہی اس کا استعمال کریں۔
قابل ذکر ہے کہ جموں و کشمیر میں ٹریفک پولیس کی جانب سے ای چالان نظام کے متعلق متعدد گاڑی مالکان شکایت کرتے آرہے ہیں کہ انکو بغیر کسی خلاف ورزی کے یا بغیر کسی وجہ کے ای چالان کیا جا رہا ہے۔ انکا کہنا تھا کہ ’’ای چالان میں پولیس کوئی بھی وجہ بتائے بغیر جرمانہ عائد کرتی ہے جس سے انکو یا تو جرمانہ ادا کرنا پڑتا ہے یا گاڑی کو ضبط کیا جا رہا ہے۔ٹریفک پولیس نے رواں برس ای چالان نظام جموں کشمیر میں لاگو کیا، تاکہ ٹریفک نظام میں بہتری آئے۔ تاہم لوگوں کا کہنا ہے کہ اس نظام سے ٹریفک میں کوئی بہتری نہیں آئی ہے البتہ گاڑی مالکان پر کافی جرمانہ عائد کیا گیا۔
