امت نیوز ڈیسک //
جموں وکشمیر کے وسطی ضلع بڈگام کے سیاحتی مقام پریہاس دودھ پتھری میں جمعرات کی سہ پہر کو بھاری برف باری کے بیچ 52 سیاح پھنس کر رہ گئے۔ پولیس کی بروقت کارروائی کے نتیجے میں سبھی سیاحوں کو محفوظ مقام کی اور منتقل کیا گیا۔
پولیس کے ایک ترجمان نے بتایا کہ خانصاحب پولیس کو اطلاع موصول ہوئی کہ پریہاس دودھ پتھری سیاحتی مقام کے نزدیک 52 سیاح برف باری کے بیچ پھنس کر رہ گئے ہیں۔
انہوں نے بتایا کہ پولیس ٹیم فوری طور پر جائے موقع پر پہنچی اور ریسکیو آپریشن شروع کیا جس دوران برف باری میں پھنسے ہوئے 52 سیاحوں کو محفوظ جگہ منتقل کیا گیا۔معلوم ہوا ہے کہ سیاحوں کو ٹنگہ نار بڈگام میں رہائشی سہولیت فراہم کی گئی۔عوامی حلقوں نے پولیس کی اس کارروائی کو خوب سراہا ہے۔
واضح رہے کہ محکمہ موسمیات کی پیش گوئی کے عین مطابق جمعرات کی سہہ پہر سے ہی وادی کشمیر کے لگ بھگ تمام حصوں میں برف باری کا سلسلہ شروع ہوا اور شام ڈھلنے کے تک سری نگر سمیت پوری وادی نے برف کی سفید چادر اوڑھ لی۔
سرکاری ذرائع کے مطابق تازہ برف کے نتیجے میں تاریخی مغل روڈ، سری نگر – لیہہ شاہراہ، گریز- بانڈی پورہ روڈ، سادھنہ ٹاپ، زوجیلا، کیرن روڈ پر ٹریفک کی نقل و حمل معطل کر دی گئی ہے۔دریں اثنا سرینگر جموں شاہراہ پر رام بن کے مقام پر چٹانیں کھسک آنے کے نتیجے میں تین سو کلومیٹر لمبی شاہراہ کو بھی شام دیر گئے ٹریفک کی نقل وحمل کے لئے بند کردیا گیا۔
