امت نیوز ڈیسک //
ترکی میں پیر کو زلزلے کے جھٹکے محسوس کیے گئے۔ ریکٹر اسکیل پر زلزلے کی شدت 7.8 درج کی گئی ہے۔ جنوب مشرقی ترکی میں زلزلے سے بھاری نقصان کی اطلاعات ہیں۔ زلزلے کے باعث یہاں کئی عمارتیں منہدم ہوگئیں۔ یہی نہیں پانچ لوگوں کے ہلاک ہونے کی خبر ہے۔ دوسری جانب شام میں بھی زلزلے کے باعث کئی عمارتیں منہدم ہوگئیں۔ بتایا جا رہا ہے کہ ترکی میں مقامی وقت کے مطابق صبح 4 بج کر 17 منٹ پر زلزلہ آیا۔ اس کی گہرائی زمین کے اندر 17.9 کلومیٹر تھی۔ ترکی کے شہر غازیانتپ کے قریب زلزلے کے جھٹکے محسوس کیے گئے۔ زلزلے کے شدید جھٹکوں سے کئی عمارتیں منہدم ہوگئیں۔ خبر رساں ادارے اے ایف پی کے مطابق اب تک پانچ افراد کی ہلاکت کی خبریں منظرعام پر آ چکی ہیں۔
بتایا جا رہا ہے کہ زلزلے کے جھٹکے لبنان اور شام میں بھی محسوس کیے گئے۔ شام کے حلب اور حما شہر سے نقصانات کی اطلاعات ہیں۔ سول ڈیفنس کے مطابق شام میں ترکی کی سرحد سے متصل علاقوں میں کئی عمارتیں منہدم ہوگئی ہیں۔ دمشق میں بھی زلزلے کے جھٹکوں کے بعد لوگ سڑکوں پر نکل آئے۔ لبنان میں تقریباً 40 سیکنڈز تک زلزلے کے جھٹکے محسوس کیے گئے۔ ترکی کے جغرافیائی محل وقوع کی وجہ سے یہاں اکثر زلزلے آتے رہتے ہیں۔ 1999 سے اب تک زلزلے سے 18000 افراد لقمۂ اجل بن چکے ہیں۔
