امت نیوز ڈیسک //
راجوری: گزشتہ روز ضلع راجوری کے کنڈی میں ہوئے تصادم میں پانچ جوان ہلاک ہوگئے تھے وہیں آج صبح پھر عسکریت پسندوں اور سکیورٹی فورسز کے درمیان فائرنگ کا تبادلہ ہوا۔ شمالی فوج کے کمانڈر لیفٹیننٹ جنرل اپیندر دویدی پہلے کنڈی پہنچ گئے تھے جہاں انہوں نے سکیورٹی صورتحال کا جائزہ لیا۔ وہیں آج مرکزی وزیر دفاع راجناتھ سنگھ جموں پہنچے جہاں جموں و کشمیر کے لیفٹیننٹ گورنر منوج سنہا اور آرمی چیف جنرل منوج پانڈے نے ان کا استقبال کیا۔ جس کے بعد آرمی چیف جنرل منوج پانڈے، منوج سنہا اور اور راجناتھ سنگھ راجوری پہنچے۔مرکزی وزیر راجناتھ سنگھ راجوری پہنچ کر سکیورٹی کا جائزہ لیں گے۔
یاد رہے کہ جموں و کشمیر میں دو دنوں میں دو انکاؤنٹر ہوئے جس میں لشکر طیبہ کا ایک عسکریت پسند اور پانچ فوجی جوان ہلاک ہوئے۔ راجوری ضلع کے کنڈی جنگلات میں جمعہ کو عسکریت پسندون کے ساتھ تصادم میں پانچ فوجی جوان ہلاک ہوئے۔ اسی دوران ہفتہ کو بارہمولہ میں ایک تصادم میں ایک عسکریت پسند ہلاک ہوا ہے۔ ان دونوں مقامات پر سیکورٹی فورسز کا سرچ آپریشن جاری ہے۔ فوج کے مطابق، جن عسکریت پسندوں نے 20 اپریل کو فوج کے ٹرک پر حملہ کیا تھا، انہوں نے جمعہ کو راجوری کے کنڈی علاقے میں فوجیوں پر حملہ کیا۔ قبل ازیں جمعرات کی شام جنوبی کشمیر کے اننت ناگ ضلع کے بجبہاڑہ علاقے میں مشتبہ عسکریت پسندوں نے سیکورٹی فورسز پر فائرنگ کی۔ اس واقعہ میں پولیس اہلکار کو معمولی چوٹیں آئیں۔ دریں اثنا، جموں و کشمیر کے لیفٹیننٹ گورنر منوج سنہا نے کل راجوری ضلع میں عسکریت پسندوں کے ساتھ تصادم کے دوران ہلاک ہوئے پانچ جوانوں کو خراج عقیدت پیش کیا۔
