امت نیوز ڈیسک //
سرینگر (جموں و کشمیر) :جموں وکشمیر پولیس نے بی جے پی لیڈر اور ڈی ڈی سی ممبر، بالہامہ، کے خلاف مبینہ طور حملہ اور ہراساں کرنے کے الزام میں مقدمہ درج کیا ہے۔ جموں و کشمیر پولیس نے کہا کہ بی جے پی لیڈر اعجاز حسین راتھر، جو حج کمیٹی کا ممبر بھی ہے، کے خلاف ناظم حسین بٹ اور امداد علی میر کی جانب سے کی گئی شکایت کی بنیاد پر پولیس اسٹیشن پانتھہ چوک میں کیس درج کیا گیا ہے۔
سری نگر پولیس نے بدھ کے روز ایک ٹویٹ کرتے ہوئے کہا: ’’ناظم حسین بٹ اور امداد علی میر کی جانب سے درج کی گئی شکایت کی بنیاد پر ڈی ڈی سی ممبر اعجاز حسین راتھر کے خلاف آئی پی سی 323،341 کے تحت ایک ایف آئی آر درج کی گئی ہے۔‘‘ ٹویٹ میں سرینگر پولیس نے میا کہا کہ ’’موصوف لیڈر پر یہ مقدمہ غلط روک تھام اور رضاکارانہ طور زیادتی کرنے کے الزام میں رجسٹر کیا گیا ہے۔‘‘قابل ذکر ہے کہ گذشتہ شام ایک ویڈیو وائرل ہوا جس میں کچھ لوگوں کو ڈی ڈی سی ممبر، اعجاز حسین کے خلاف سرینگر کی پریس کالونی میں احتجاج کرتے ہوئے دیکھا جا سکتا ہے جو بی جے پی لیڈر پر حملہ کرنے اور انہیں ہراساں کرنے کا الزام عائد کر رہے ہیں۔ دریں اثناء، سرینگر میونسپل کارپویشن کے میئر جنید عظیم متو نے اپنے ٹویٹر ہینڈل پر ایک ٹویٹ میں کہا کہ ’’بی جے پی سے تعلق رکھنے والے موجودہ ڈی ڈی سی ممبر بالہامہ، سرینگر، نے لوگوں میں خوف و دہشت کا ماحول پھیلا رکھا ہے۔‘‘ انہوں نے ٹویٹ میں مزید کہا کہ ’’یہ ایک ماہ سے کم عرصے میں اس کی طرح سے کسی شہری پر کیا جانے والا دوسرا حملہ ہے۔‘‘
