امت نیوز ڈیسک//
دہلی: پارلیمنٹ کے سرمائی اجلاس کے درمیان ارکان پارلیمنٹ کی معطلی کا سلسلہ آج بھی جاری رہا۔ پلے کارڈز کے ساتھ احتجاج کرنے والے مزید دو ارکان پارلیمنٹ کو سرمائی اجلاس کے لیے لوک سبھا سے معطل کردیا گیا ہے۔ لوک سبھا کے ارکان سی تھامس اور ایم اے عارف کو آج معطل کردیا گیا۔ تازہ طور پر کاروائی دو ارکان کے خلاف کی گئی جن پر لوک سبھا میں پلے کارڈز کے ساتھ احتجاج کرنے کا الزام ہے، انہیں پورے سرمائی اجلاس کے لیے معطل کردیا گیا۔ سی تھامس اور اے ایم عارف کی معطلی کے بعد اب تک معطل کیے گئے اراکین پارلیمنٹ کی کل تعداد 143 ہو گئی ہے۔
اپوزیشن ارکان پارلیمنٹ کی سیکوریٹی میں چوک معاملہ پر وزیراعظم اور وزیر داخلہ سے ایوان میں بیان دینے کا مطالبہ کررہے ہیں۔ ان کا کہنا ہے کہ اگر وزیراعظم نریندر مودی اور وزیر داخلہ امت شاہ اس معاملہ پر ایوان کے باہر بیان دے سکتے ہیں تو پھر ایوان میں بیان دینے سے کیوں بچ رہے ہیں۔
اس معاملہ پر اپوزیشن ارکان بضد ہیں اور احتجاج کو جاری رکھے ہوئے ہیں۔سماج وادی پارٹی کے سینئر لیڈر و سابق کابینی وزیر رام اچل راج بھر اور لال جی ورما نے بدھ کو کہا کہ لوک سبھا میں اراکین پارلیمنٹ کی معطلی بی جے پی حکومت کی تاناشاہی کا ثبوت ہے۔ انہوں نے سرکٹ ہاوس میں میڈیا نمائندوں سے بات چیت میں کہا کہ لوک سبھا میں اراکین پارلیمنٹ کی معطلی بی جے پی کی تانا شاہی ذہنیت کا عکاس ہے۔ لوک سبھا میں سبھی اراکین کو بولنے کا حق ہے۔ ملک میں جمہوریت اور آئین کو بچانے کے لئے اگلے لوک سبھا الیکشن میں بی جے پی کو اترپردیش کی سبھی 80 سیٹوں پر ہرانے کا کام کیا جائے گا۔ اس ہدفت کو لے کر ہم لوگ آگے بڑھ رہے ہیں۔
