امت نیوز ڈیسک //
سری نگر: جموں و کشمیر کے لیفٹیننٹ گورنر منوج سنہا نے وزیر اعظم نریندر مودی کی طرف سے ہفتے کے روز کٹرہ – دہلی دوسری وندے بھارت ٹرین کے افتتاح کو جموں وکشمیر کے لئے ایک تاریخی دن قرار دیتے ہوئے کہا کہ اس ٹرین سروس سے شری ماتا ویشنو دیوی کے عقیدت مندوں کے سفر میں آسانی اور شہریوں کو کافی آرام میسر ہوگا۔
انہوں نے کہا: ‘وزیر اعظم کی قیادت میں جموں و کشمیر میں معیاری انفراسٹرکچر کی رفتار تیز گام ہے’۔
بتادیں کہ وزیر اعظم نریندر مودی نے ہفتے کو کٹرا تا دہلی دوسری وندے بھارت ٹرین کا ورچول افتتاح کیا۔
موصوف لیفٹیننٹ گورنر نے وزیر اعظم کا شکریہ ادا کرتے ہوئے ‘ایکس’ پر ایک پوسٹ میں کہا: ‘جموں وکشمیر کے لئے یہ ایک تاریخی دن ہے میں شری ماتا ویشنو دیوی (کٹرا – دلی) کے لئے دوسری وندے بھارت ٹرین کے لئے وزیر اعظم نریندر مودی جی کا مشکور ہوں’۔
انہوں نے کہا: ‘ اس ٹرین سروس سے شری ماتا ویشنو دیوی کے عقیدت مندوں کے سفر میں آسانی اور شہریوں کو کافی آرام میسر ہوگا۔
مسٹر سنہا نے کہا کہ وزیر اعظم کی قیادت میں جموں و کشمیر میں معیاری انفراسٹرکچر کی رفتار تیز گام ہے۔
انہوں نے کہا: ‘جامع ترقی کے لئے آخری میل کی کنیکٹیوٹی سے دور افتادہ علاقوں میں شہریوں کی زندگی آسان تر ہوئی ہے، ان کی معاشی سرگرمیوں میں اضافہ اور روز گار کے مواقع بڑھ گئے ہیں’۔
لیفٹیننٹ گورنر نے کہا کہ جموں صوبے کے کئی سیاحتی مقامات میں سیاحوں کا بے تحاشا رش ہے جس سے مقامی معیشت کو دوام مل گیا ہے۔
انہوں نے کہا: ‘شیو کھوری شرائن بورڈ شرائن کی ترقی کے لئے پر عزم ہے۔
انہوں نے امید ظاہر کی کہ کٹرا سے شیو کھوری تک آنے والے دنوں میں ہیلی سروس شروع کی جائے گی۔
