امت نیوز ڈیسک //
پونچھ (جموں کشمیر) : حفاظتی اہلکاروں نے بدھ کو صوبہ جموں کے پونچھ ضلع میں تلاشی آپریشن کے دوران بھارت – پاکستان لائن آف کنٹرول (ایل او سی) کے قریب ڈھائی کلو گرام وزنی منشیات کو ضبط کرنے کا دعویٰ کیا ہے۔ حفاظتی اہلکاروں کے مطابق منشیات کو تین پیکٹس میں پیک کرکے سرحد کے اِس پار پھینکا گیا ہے۔ حفاظتی اہلکاروں کے مطابق اس سے قبل کہ منشیات کی یہ کھیپ لائن آف کنٹرول کے پار سے اسمگل کرکے اسمگلروں / منشیات فروشوں تک پہنچ پاتی، سیکورٹی فورسز کی ٹیم نے کھیپ کو اپنے قبضے میں لے لیا۔
حکام نے بتایا کہ ایل او سی کے پار سے منشیات خاص کر ہیروئن اور کوکین اِس پار بھیجا جاتا ہے اور نارکو ٹیررزم کے اسی نیٹورک کو تہس نہس کرنے کے لیے حفاظتی ایجنسیز ہمیشہ مستعد رہتی ہیں۔ ادھر، پونچھ میں ضبط کیے گئے اڑھائی کلوگرام وزنی تین نارکو پیکٹس کی مالیت عالمی منڈی میں کروڑوں روپے بتائی جا رہی ہے۔ سیکورٹی ایجنسیز کا کہنا ہے کہ اس سے قبل بھی سرحد، ایل او سی پر ڈرونز یا دراندازوں کے لیے منشیات کو اِس پار بھیجنے کی کوششیں لگاتار کی جا رہی ہیں جبکہ مستعد فوجی، پولیس سمیت دیگر سیکورٹی ایجنسیز اس کا مقابلہ کرنے کے لیے ہمیشہ کمربستہ رہتے ہیں۔
فوج اور پولیس کے اعلیٰ افسران کا کہنا ہے کہ جموں و کشمیر میں پنجاب کے طرز پر پاکستان کی جانب سے نارکو ملی ٹینسی کو فروغ دیا جا رہا ہے۔ بندوق کے راستے سے داخل ہونے والے افراد جو کہ اب پوری طرح سے پست اور ناکام ہوئے، اب جموں و کشمیر کے نوجوانوں کو منشیات کا عادی بنانے کے درپے ہیں۔
