امت نیوز ڈیسک //
19 فروری، سری نگر: شمالی کشمیر کے بانڈی پورہ ضلع کے حاجن علاقے میں ایک 38 سالہ شخص آپسی جھگڑے کے دوران اپنے کزن کے ہاتھوں ہی اپنی جان گنوا بیٹھا ہے۔
سری نگر کی خبر رساں ایجنسی کشمیر اسکرول نے ذرائع کے حوالے سے بتایا کہ مقتول کی شناخت غلام محی الدین پرے کے نام سے ہوئی ہے، جھڑپ کے دوران وہ شدید زخمی ہوا اور اسے قریبی اسپتال منتقل کیا گیا۔ جہاں سے اسے سکمز صورہ ریفر کیا گیا، جہاں اس نے آخر کار آخری سانس لی۔
رپورٹ کے مطابق دونوں خاندانوں کے درمیان خاندانی معاملے پر لڑائی بڑھ گئی جس نے شدید رخ اختیار کیا ۔
پولیس نے فوری کارروائی کرتے ہوئے ملزم کو گرفتار کر کے مزید تفتیش کے لیے مقدمہ درج کر لیا گیا ہے۔
واضح رہے یہ واقعہ حالیہ ہفتوں میں خطے میں تیسرا پرتشدد خاندانی تنازعہ ہے۔ اس سے پہلے سوپور میں ایک نوجوان کو اس کے بھائی نے قتل کیا تھا، اس کے بعد گاندربل میں ایک بزرگ کا قتل ہوا تھا اور پٹن علاقے میں اس کے بھائی کے سر پر کلہاڑی مارنے کے بعد ایک شخص زندگی کی جنگ لڑ رہا ہے۔
