امت نیوز ڈیسک //
سری نگر: کشمیر پاﺅرڈیولپمنٹ کارپوریشن لمیٹڈ کی جانب سے وادی کے سبھی 10اضلاع کے ڈپٹی کمشنروں کو بھیجے گئے ایک مکتوب کہ، سرکاری ملازمین کی تنخواہوں اور ٹھیکیداروں کی زیر التواءبلوں کو تب تک واگزار نہ کیاجائے ،جب تک کہ وہ اپنی زیر التواءیاواجب الادابجلی بلوں کی ادائیگی کو یقینی نہ بنائیں ،کے بعد تمام ڈپٹی کمشنروں نے KPDCLکی جاری کردہ ایڈوائزری پر عمل درآمد شروع کردیاہے۔
جے کے این ایس کومعلوم ہواکہ ڈپٹی کمشنروں نے باضابطہ طور پر احکامات جاری کئے ہیں کہ تمام سرکاری ملازمین اور ٹھیکیداروں کو مشورہ دیا جاتا ہے کہ وہ اپنی تنخواہوں اور خزانے سے ادائیگیوں کے اجراءکے لیے اپنے زیر التواءپاور بلوں یعنی بقایابجلی فیس کو کلیئر کریں۔
ڈپٹی کمشنروں نے مختلف ماتحت محکموں کے سربراہان کو ہدایت دی ہے کہ کشمیر پاﺅرڈیولپمنٹ کارپوریشن لمیٹڈ کی جاری کردہ ایڈوائزری پر عمل درآمد کویقینی بنایا جائے ،اورتب تک سرکاری ملازمین کی تنخواہوں اور ٹھیکیداروں کی خزانے سے ادائیگیوں کے اجراءپرروک لگائی جائے ،جب تک کہ وہ بقایابجلی بل یا فیس ادانہ کریں۔
قابل ذکر ہے کہ جموں وکشمیرمیں مختلف سرکاری محکموں میں کام کرنے والے ملازمین کی تعداد لگ بھگ 5لاکھ ہے۔افسروں و انجینئروں کیساتھ ساتھ ٹھیکیداروں کی تعدادبھی ہزاروں میں ہے ،اورایسے میں اگر جاری کردہ ایڈوائزری پر عمل درآمد کویقینی بنایا جاتا ہے تو کشمیر پاﺅرڈیولپمنٹ کارپوریشن لمیٹڈ کو بقایابجلی بلوں کی صورت میں کروڑوں روپے کی آمدنی حاصل ہوگی۔
