امت نیوز ڈیسک //
نئی دہلی: رمضان المبارک کا آغاز ہو چکا ہے۔ ملک بھر میں مسلمان روزہ کا اہتمام کر رہے ہیں۔ ملک کے وزیراعظم نریندر مودی نے سوشل میڈیا پلیٹ فارم ایکس پر ایک پوسٹ شیئر کرتے ہوئے ملک کے عوام کو ماہ رمضان کی مبارکباد دی ہے۔ پی ایم مودی نے اپنی پوسٹ میں لکھا، سب کو رمضان المبارک کی خوشیاں مبارک ہوں۔ دعا ہے کہ یہ مقدس مہینہ سب کی زندگیوں میں خوشیاں، اچھی صحت اور خوشحالی لائے۔
کانگریس پارٹی کے قومی صدر ملیکارجن کھرگے نے بھی اپنے ایکس ہینڈل سے ایک پوسٹ شیئر کرتے ہوئے رمضان کریم کی مبارکباد دی ہے۔ کھرگے نے اپنی پوسٹ میں لکھا، مبارکباد اور نیک تمنائیں، جیسے ہی رمضان کا مقدس مہینہ شروع ہوتا ہے، دعاؤں، برکتوں اور استغفار کا وقت آ جاتا ہے۔ انھوں نے مزید کہا کہ، ہم انسانیت کی خدمت کے اپنے عزم کی تجدید کریں اور سب کے درمیان ہمدردی، امن اور ہم آہنگی کو فروغ دینے کی کوشش کریں۔ رمضان مبارک!
کانگریس کے سابق صدر اور رکن پارلیمنٹ راہل گاندھی نے ایکس پر ایک رمضان کا گریٹنگ کارڈ پوسٹ کرتے ہوئے رمضان کی آمد پر خوشی کا اظہار کیا ہے۔ راہل گاندھی نے اپنی پوسٹ میں لکھا، رمضان مبارک، یہ بابرکت مہینہ سب کے لیے امن، خوشی اور اچھی صحت لے کر آئے۔
وہیں، کانگریس کی جنرل سکریٹری پرینکا گاندھی نے بھی ایکس پر ایک پوسٹ شیئر کرتے ہوئے رمضان کی آمد پر لوگوں کو مبارکباد دیتے ہوئے نیک تمناوں کا اظہار کیا ہے۔ پرینکا گاندھی نے اپنی پوسٹ میں لکھا، رمضان المبارک کی برکتوں اور رحمتوں کا مہینہ آپ سب کو دل کی گہرائیوں سے مبارک ہو۔ دعا ہے کہ یہ مقدس مہینہ آپ کی زندگیوں میں خوشیاں، برکتیں اور سکون لے کر آئے۔
