امت نیوز ڈیسک//
سرینگر : الیکشن کمیشن آف انڈیا (ای سی آئی) نے ہفتہ کو جموں و کشمیر میں لوک سبھا انتخابات کے شیڈول کا اعلان کیا۔ اعلان کے مطابق جموں و کشمیر میں ووٹنگ کا عمل پانچ مرحلوں میں ہوگا جبکہ ووٹوں کی گنتی 4 جون کو ہوگی۔ جموں و کشمیر میں انتخابی عمل کا آغاز فیز 1 (اُدھم پور) میں 19 اپریل کو ووٹنگ کے ساتھ ہوگا، اس کے بعد فیز 2 (جموں) 26 اپریل کو، فیز 3 (اننت ناگ) 7 مئی کو، فیز 4 (سرینگر) 13 مئی، اور فیز 5 (بارہمولہ) 20 مئی کو۔ ان مراحل کے اختتام کے بعد ووٹوں کی حتمی گنتی 4 جون کو ہوگی۔
چیف الیکشن کمشنر راجیو کمار نے ہفتہ کو لوک سبھا انتخابات کی تاریخوں کا اعلان نئی دہلی میں پریس کانفرنس کے دوران کیا۔ انہوں نے اعلان کیا کہ 2024 کے لوک سبھا انتخابات سات مرحلوں میں منعقد ہوں گے۔ جو 19 اپریل سے شروع ہوں گے اور یکم جون کو اختتام ہوں گے۔ اور ووٹوں کی گنتی چار جون کو عمل میں لائی جائے گی۔
الیکشن کمشنر نے جموں و کشمیر میں اسمبلی انتخابات کو حفاظتی صورتحال کا حوالہ دیتے ہوئے لوک سبھا الیکشن کے بعد منعقد کرانے کی یقین دہانی کی۔ میڈیا نمائندوں کی جانب سے پوچھے گئے سوالات کے جواب میں چیف الیکشن کمشنر راجیو کمار نے کہا: ’’جموں و کشمیر میں اسمبلی انتخابات ’تنظیم نو قانون‘ اور بعد ازاں حد بندی کی وجہ سے منعقد نہیں ہوئے۔ تنظیم نو ایکٹ میں ضروری ترمیم تاخیر سے ہوئی ہے اور بعد ازاں اسمبلی نشستوں کی تعداد میں اضافہ اور تخصیص بھی بدل گئی ہے۔‘‘ واضح رہے کہ جموں و کشمیر میں سال 2014میں اسمبلی انتخابات منعقد ہوئے تھے۔
