امت نیوز ڈیسک //
سرینگر:الیکشن کمیشن آف انڈیا نے جموں کشمیر کے سابق وزیر اعلیٰ غلام نبی آزاد کی جماعت ’’ڈیموکریٹک پراگریسیو آزاد پارٹی‘‘ (ڈی پی اے پی) کو آنے والے پارلیمانی انتخابات کے لئے ’’بالٹی‘‘ کا نشان الاٹ کیا ہے۔ غلام نبی آزاد نے اپنی نئی جماعت ڈی پی اے پی کانگریس سے استعفیٰ دینے کے بعد بنائی تھی اور انہوں نے پارٹی کا نشان تین رنگوں پر مشتمل ایک جھنڈے کی صورت میں رکھا ہے۔ تاہم اس جماعت کو یہ نشان تب ہی مل سکتا ہے جب وہ اسمبلی انتخابات میں چار سیٹیں جیت پائے گی۔
ڈی پی اے پی کے ترجمان سلمان نظامی نے تصدیق کرتے ہوئے کہا کہ الیکشن کمیشن آف انڈیا نے پارلیمانی انتخابات کے لئے ’بالٹی‘ (Bucket) کا نشان دیا ہے۔ آزاد نے یہ پارٹی کانگریس کو چھوڑنے کے بعد بنائی تھی اور ان کے ساتھ کانگریس کے متعدد لیڈران نے شمولیت کی تھی، تاہم کچھ مہینوں کے بعد ہی یہ لیڈران کانگرس میں واپس شامل ہوئے۔
آزاد، آنے والے پارلیمانی انتخابات سید الطاف بخاری کی جموں کشمیر اپنی پارٹی کے ساتھ الائنس میں لڑنے جا رہے ہیں۔ بتایا جاتا ہے کہ آزاد اننت ناگ – راجوری نشست سے خود انتخابات میں حصہ لیں گے۔ انہوں نے سنہ 2014 میں کانگریس کی ٹکٹ پر ادھمپور- ڈودہ نشست سے انتخابات لڑے تھے لیکن وہاں ان کو بی جے پی کے امیدوار سے شکست فاش کا سامنا کرنا پڑا تھا۔
