امت نیوز ڈیسک //
سرینگر: مریضوں کی دیکھ بھال کو بہتر بنانے کے لیے محکمۂ صحت وطبی تعلیم نے ایک اہم پیش رفت کے تحت جموں وکشمیر کے گورنمنٹ میڈیکل کالجز اور گورنمنٹ ڈینٹل کالجز سے منسلک سبھی اسپتالوں میں کام کے دنوں اور اوقات کار میں توسیع کا اعلان کر دیا ہے۔ اس حوالہ سے جمعرات کو باضابطہ ایک حکم نامہ جاری کیا گیا ہے۔ جس کی رو سے جی ایم سی سرینگر اور جی ایم سی جموں اور گورنمنٹ ڈینٹل کالجز سے منسلک اسپتالوں میں ڈاکٹر کے اوقات کار میں تبدیلی لاکر صبح نو بجے سے سہ پہر پانچ بجے تک رکھا ہے۔ تاہم سنیچر کو یہ وقت صبح 9 بجے سے لے کر دوپہر ڈیڑھ بجے تک ہی رہے گا۔ البتہ اس نئے اوقات کار میں دن کے ڈیڑھ بجے سے دوپہر 2 بجے تک لنچ بریک بھی رکھا گیا ہے۔
ایسے میں اب مریضوں سے سرینگر کے ایس ایم ایچ اسپتال، بون اینڈ جوائنٹ برزلہ، چیسٹ ڈیزیز اسپتال، سپر اسپیشالٹی اور امراض خواتین کے بڑے اسپتال وغیرہ میں سنیچر کو چھوڑ کر ہفتہ کے سبھی دنوں میں صبح 9 بجے سے سہ پہر 5 بجے تک او پی ڈی میں علاج کروا سکتے ہیں۔
اس سے قبل مذکورہ اسپتالوں او پی ڈی اوقات کار تقریباً 11 بجے سے شروع کر 2 بجے تک ہی رہتا تھا۔اب چونکہ سرکاری کی جانب سے اٹھائے گئے اقدام سے بیماروں اور تیمار داروں کو کافی راحت ہو گی۔ اب مریض یاتیمار دار اپنے وقت کا بہتر طور تعین کر کے جی ایم سی کے منسلک اسپتالوں میں علاج کروا سکتے ہیں اور اس مثبت پہل سے مریضوں کی دیکھ بھال کو یقینی بنایا جاسکتا ہے۔
