امت نیوز ڈیسک //
18 اپریل :پی ڈی پی کی صدر محبوبہ مفتی نے جمعرات کو جموں و کشمیر کے اننت ناگ-راجوری لوک سبھا حلقہ سے پرچہ نامزدگی داخل کیا جو 7 مئی کو انتخابات کے تیسرے مرحلے میں ہونے والی ہے۔ کئی پارٹی قائدین اور سینکڑوں حامیوں کے ساتھ محبوبہ ڈپٹی کمشنر اننت ناگ سید فخرالدین کے دفتر پہنچیں جو اس حلقے کے ریٹرننگ آفیسر ہیں۔
بعد میں نامہ نگاروں سے بات کرتے ہوئے، سابق وزیر اعلیٰ نے لوگوں سے اپیل کی کہ وہ انتخابات کا بائیکاٹ نہ کریں کیونکہ "یہ انتخاب جموں و کشمیر کے وقار، شناخت اور وسائل پر حملے کے بارے میں ہیں "۔
محبوبہ نے کہا کہ” میں جموں و کشمیر کے تمام لوگوں سے اپیل کرتی ہوں کہ وہ انتخابات کا بائیکاٹ نہ کریں۔ جنوبی کشمیر میں وہ بائیکاٹ نافذ کرنے کی کوشش کر رہے ہیں۔ ان کی سازشوں کو بے نقاب کیا جائے۔ اس امیدوار کو ووٹ دیں جو آپ محسوس کرتے ہیں کہ وہ مظلوم لوگوں اور جیلوں میں بند لوگوں کے لیے آواز اٹھائے گا۔‘‘
پی ڈی پی صدر نے کہا کہ یہ لوک سبھا الیکشن بجلی، پانی اور سڑکوں جیسے ترقیاتی مسائل سے متعلق نہیں ہے۔ یہ الیکشن ‘بجلی، پانی یا سڑک’ کے لیے نہیں ہے۔ یہ الیکشن اس حملے کو ختم کرنے کے لیے ہے جو 2019 کے بعد ہمارے وقار، شناخت، اثاثوں اور وسائل پر شروع کیا گیا تھا۔ یہ پی ڈی پی یا این سی یا کسی اور پارٹی کے بارے میں نہیں ہے۔ اس وقت مسئلہ یہ ہے کہ کشمیر کو ایک کھلی فضائی جیل میں تبدیل کر دیا گیا ہے۔
انہوں نے مزید کہا کہ، آج ہمارے تمام وسائل ہم سے چھینے جا رہے ہیں اور ہمیں بندھوا مزدور بنانے کی کوشش کی جا رہی ہے۔ ہم ایسا نہیں ہونے دیں گے۔ یہ زمین اور اس زمین میں نوکریاں ہماری ہیں۔ ہم اپنی شناخت پر حملوں کی اجازت نہیں دیں گے،‘۔
