امت نیوز ڈیسک //
گاندربل:سرینگر- کرگل سڑک پر جمعہ کو پیش آئے ایک سڑک حادثے میں کم از کم 5 افراد زخمی ہوگئے ہیں۔پولیس ذرائع نے بتایا کہ کرگل سے جموں کی طرف جارہی ایک سوفٹ ڈیزائر کار زیر نمبر 2903-JK02BG کو باجری نالہ زوجیلا کے مقام پر اچانک ڈرائیور کے قابو سے باہر ہوکر گہری کھائی میں جاگری۔
اُنہوں نے بتایا کہ گاڑی تقریباً 30 فٹ گہری کھائی میں جاگری جس کے نتیجے میں گاڑی میں سوار ڈرائیور سمیت پانچ افراد زخمی ہو گئے۔حادثے کی اطلاع ملتے ہی ایس ایچ او سونمرگ جائے موقع پر روانہ ہوئے اور زخمیوں کو فوری طور پر علاج کے لئے پرائمری ہیلتھ سنٹر سونہ مرگ منتقل کیا۔
ذرائع نے بتایا کہ پانچ میں سے تین کو نازک حالت میں صورہ میڈیکل انسٹی چیوٹ منتقل کیا گیا ہے۔پولیس نے حادثے کی وجوہات جاننے کی خاطر کیس درج کرکے تحقیقات شروع کی۔
غور طلب ہے کہ جموں و کشمیر کے دونوں صوبوں میں ہر سال ٹریفک حادثات میں سینکڑوں افراد ہلاک جبکہ متعدد افراد زخمی ہوتے ہیں۔ حکام اور ماہرین کے مطابق ٹریفک قوانین سے ناواقفیت اور ان پر عمل درآمد نہ کرنا ٹریفک حادثات کا موجب بنتے ہیں، تاہم لوگوں کا ماننا ہے کہ خستہ حال سڑکیں بھی حادثات کا موجب بنتی ہیں۔
