امت نیوز ڈیسک //
شوپیاں: وادی کشمیر کو جموں کے پونچھ اور راجوری اضلاع سے جوڑنے والی تاریخی مغل روڈ پر برف باری کا سلسلہ شروع ہو چکا ہے۔ پیر کی گلی کے مقام پر ہلکی برف باری جاری ہے، جس کی وجہ سے پورا روڈ ہلکی برف سے ڈھک گیا ہے اور خطے میں سردی کی شدت میں مزید اضافہ ہو گیا ہے۔
ضلع شوپیان کے دیگر علاقوں میں بھی درجہ حرارت میں نمایاں کمی دیکھی جا رہی ہے، جس کے باعث لوگوں کو سخت سردی کا سامنا ہے۔ مغل روڈ پر برف باری کی وجہ سے سڑکوں پر پھسلن بڑھ گئی ہے، جس سے سفر کرنا خطرناک ہو سکتا ہے۔
انتظامیہ نے مسافروں کو محتاط رہنے اور غیر ضروری سفر سے گریز کرنے کی ہدایت دی ہے۔ اسی کے ساتھ برف باری کے دوران گاڑیوں کی رفتار کم رکھنے اور حفاظتی تدابیر اختیار کرنے پر زور دیا گیا ہے تاکہ کسی بھی قسم کے حادثے سے بچا جا سکے۔
موسمی حالات کو مدنظر رکھتے ہوئے، محکمہ موسمیات نے مزید برف باری کا امکان ظاہر کیا ہے، جس سے سردی میں مزید اضافہ ہو سکتا ہے۔ مسافروں کو سفر سے پہلے سڑک کی صورت حال اور موسمی حالات سے متعلق محکمے کی پیش گوئیوں کے بارے میں آگاہ رہنے کی اپیل کی ہے۔
