امت نیوز ڈیسک //
جموں و کشمیر بھر کے اسپتالوں میں مریضوں کی دیکھ بھال میں کوئی سمجھوتہ قابل قبول نہیں ہے کی بات کرتے ہوئے وزیر صحت سکینہ مسعود ایتو نے کہا کہ امراض چھاتی کے اسپتال کی ڈلگیٹ سے سونہ وار منتقلی کو لیکر حکومت کے پاس کوئی منصوبہ زیر غور نہیں ہے۔
سی این آئی کے مطابق وزیر صحت و طبی تعلیم سکینہ ایتو نے ڈلگیٹ سرینگر میں واقع امراض چھاتی کے اسپتال کا دورہ کرکے وہاں مریضوں کو بہم ہونے والی سہولیات کا جائزہ لیا ۔ اس موقعہ پر انہوں نے میڈیا سے بات کرتے ہوئے کہا کہ اسپتال کے دوروں کا مقصد ان مسائل کو حل کرنا ہے،۔ انہوں نے مزید کہا”مریضوں کی دیکھ بھال پر کوئی سمجھوتہ نہیں ہونا چاہیے۔ جہاں چیلنجز موجود ہیں، حکومت اس بات کو یقینی بنانے کے لیے مداخلت کرے گی کہ خدمات کو موثر طریقے سے فراہم کیا جائے“۔اس سوال کے جواب میں کہ سی ڈی اسپتال کو سونہ منتقل کیا جائے گا انہوں نے واضح کیا کہ ایسی کوئی تجویز نہیں ہے۔ تاہم، بھیڑ، بستروں کی کمی، اور لفٹوں اور ریمپ کی عدم موجودگی ایسے مسائل ہیں جن پر توجہ دینے کی ضرورت ہے، اور ہم انہیں حل کرنے کے لیے کام کریں گے۔
طبی پیشہ ور افراد کے رویے کے بارے میں، وزیر نے زور دیا،”میں ڈاکٹروں سے مطالبہ کرتا ہوں کہ وہ مریضوں کے تئیں اپنا نقطہ نظر بہتر بنائیں اور اس بات کو یقینی بنائیں کہ بہترین طریقے سے دیکھ بھال کی جائے“۔نجی اسپتالوں میں لاپرواہی کے بارے میں پوچھے جانے پر انہوں نے سختی سے کہا”غفلت خواہ کتنا ہی بااثر شخص یا ادارہ کیوں نہ ہو، برداشت نہیں کیا جائے گا۔ مریضوں کی دیکھ بھال ایک ترجیح ہے، اور سمجھوتہ کی کوئی گنجائش نہیں ہوگی“۔سکینہ نے یقین دلایا کہ حکومت جموں و کشمیر میں عوامی شکایات کو دور کرنے اور صحت کی دیکھ بھال کے بنیادی ڈھانچے کو بڑھانے کیلئے پرعزم ہے۔
