امت نیوز ڈیسک //
جموں: جموں و کشمیر کے ضلع کٹھوعہ میں اتوار کے روز سکیورٹی فورسز اور عسکریت پسندوں کے بیچ شدید فائرنگ کا تبادلہ ہوا۔ حکام کے مطابق یہ جھڑپ اس وقت ہوئی جب فورسز علاقے میں چھپے عسکریت پسندوں کا سامنا کیا، جو سرحد پار سے دراندازی کرکے بھارت میں داخل ہوئے تھے۔ ذرائع کے مطابق شام کے وقت دونوں طرف سے فائرنگ کا سلسلہ تقریباً آدھے گھنٹے تک جاری رہا اور آج دوسرے روز بھی عسکریت پسندی مخالف آپریشن جاری ہیں۔
حکام نے بتایا کہ یہ آپریشن انٹیلی جنس اطلاعات کے بعد شروع کیا گیا تھا، جس میں عسکریت پسندوں کی موجودگی کی اطلاع دی گئی تھی۔ یہ گاؤں سانیال میں واقع ہے، جو بین الاقوامی سرحد سے تقریباً پانچ کلومیٹر کے فاصلے پر ہے۔
اس اطلاع پر اسپیشل آپریشنز گروپ کی پولیس ٹیم نے سرچ آپریشن شروع کیا۔ تاہم، علاقے میں داخل ہوتے ہی سکیورٹی اہلکاروں پر عسکریت پسندوں نے شدید فائرنگ شروع کر دی، جس کے نتیجے میں مسلح جھڑپ شروع ہوگئی۔
اس کے بعد آپریشن میں فوراً اضافی دستے بھیج دیے گئے تاکہ عسکریت پسندوں کو گھیرنے کی کارروائی کو مضبوط کیا جا سکے۔ جموں و کشمیر کے ڈائریکٹر جنرل پولیس نلن پربھات آپریشن کی خود نگرانی کر رہے ہیں۔
