امت نیوز ڈیسک //
سرینگر : جموں وکشمیر حکومت نے دفتری اوقات کے دوران ڈاکٹروں کی پرائیویٹ پریکٹس پر پابندی عائد کر دی ہے۔ اس حوالے سے سرکار نے تازہ فرمان جاری کیا ہے۔ حکومت کی جانب سے اس تعلق سے جاری کیے گئے ایک تازہ حکم نامے میں تمام میڈیل کالجوں کے پرنسپلز اور ان سے منسلک اسپتالوں کے میڈیکل سپرنٹنڈنٹس، چیف میڈیکل افسران اور تمام ضلع اسپتالوں کے میڈیکل سپرنٹنڈنٹس کو ہدایت دی گئی ہے کہ وہ اس بات کو یقینی بنائیں کہ ان کے زیر نگرانی کام کرنے والے تمام اسپتالوں کے ڈاکٹر دوران دفتری اوقات کے کوئی بھی پرائیویٹ پریکٹس نہ کریں۔
*خلاف ورزی کرنے والوں کے خلاف ہوگی کارروائی*
حکم نامے میں مزید کہا گیا ہے کہ کچھ ڈاکٹر اسپتالوں میں ڈیوٹی کے اوقات کے دوران پرائیویٹ پریکٹس کررہے ہیں کہ جس کی وجہ سے نہ صرف مریضوں کو مشکلات کا سامنا کرنا پڑتا ہے بلکہ اسپتالوں کا کام کاج بھی متاثر ہورہا ہے۔ ایسے میں خلاف ورزی کرنے والے تمام ڈاکٹروں کے خلاف کارروائی کی جائے گی۔
*پرائیویٹ پریکٹس کی شکایت کی ہوگی تحقیقات*
حکم نامے میں مزید لکھا گیا ہے کہ ڈاکٹروں کو ان اسپتالوں میں موجود رہنا ہوگا جہاں وہ تعینات ہوں گے۔ تمام اسپتالوں کے سربراہاں کو ہدایت دی گئی ہے کہ وہ ڈاکٹروں کی حاضری پر نظر رکھیں اور اس بات کو یقینی بنائیں کہ اسپتالوں کا کام کاج کسی طرح متاثر نہ ہو۔ جب کہ ڈیوٹی کے دوران کسی بھی ڈاکٹر کے خلاف پرائیویٹ پریکٹس کی شکایت کی تحقیقات کی جائے اور اس کے خلاف کارروائی کی جائے۔ ایسے میں تمام اسپتالوں کے سربراہان پر سخت دباؤ ہے کہ اچانک اسپتالوں کا معائنہ کرکے حکم نامے سختی سے لاگو کریں۔
