امت نیوز ڈیسک //
جموں و کشمیر وقف بورڈ نے ہفتے کے رور اپنے ملازمین کے لیے تنخواہوں میں اضافے کا اعلان کیا ہے۔
یہ اعلان بورڈ کی چیئر پرسن ڈاکٹر درخشاں اندرابی نے ہفتے کو یہاں ایک پریس کانفرنس کے دوران کیا۔
انہوں نے کہا بورڈ نے ایک نظرثانی شدہ تنخواہ کا ڈھانچہ نافذ کیا ہے جس سے مختلف زمروں کے ملازموں کو فائدہ پہنچے گا ۔
انہوں نے مزید کہا تنخواہ کے ڈھانچے کو مہارت کی سطح کی بنیاد پر درجہ بندی کیا گیا ہے، ہنر مند ملازمین کو اب 18 ہزار روپیے ماہانہ جبکہ نیم ہنر مند ملازمین کو 16 ہزار روپیے ماہانہ تنخواہ ملیں گے ۔ ان کا کہنا ہے کہ غیر ہنر مند ملازمین کو ماہانہ 15 ہزار روپئے تنخواہ دی جائے گی۔
ڈاکٹر اندرابی نے کہا کہ اماموں، خطیبوں اور وقف کے مستقل ملازموں کے بنیادی تنخواہ میں 20 فیصد اضافہ کر دیا گیا ہے۔ انہوں نے کہا کہ ائمہ اور خطیبوں کی وجہ سے ہی وقف چلتا ہے۔ ان کا کہنا تھا: یہ ایک تاریخی فیصلہ ہے کیونکہ ہمارے ملازموں کو بہت کم تنخواہ ملتی تھی ۔ چیئر پرسن نے کہا کہ آج کی مہنگائی میں بھی وقف میں کچھ ملازموں کو 3 ہزار یا 4 ہزار ماہانہ تنخواہ ملتی تھی ۔ انہوں نے کہا کہ وقف میں تبدیلی آئی ہے اور جن لوگوں نے محنت ان کو اس کا پھل ملنا چاہئے۔ اندرابی نے کہا یہ ہماری فیملی ہے جن کو آج ہم نے یہ عید کا تحفہ دیا۔
