امت نیوز ڈیسک //
جموں: جموں و کشمیر کے ضلع ادھمپور میں جمعرات کے روز سیکیورٹی فورسز اور عسکریت پسندوں کے درمیان تصادم کی خبر ہے۔ سرکاری ذرائع کے مطابق ضلع کے ڈوڈو ۔ بسنت گڑھ علاقے میں عسکریت پسندوں اور سیکوریٹی فورسس کے دریعہ شدید فائرنگ کا تبادلہ جاری ہے۔ یہ علاقہ گھنے جنگل کے لیے جانا جاتا ہے، بھارتی فوج کی 9 کور کے دائرہ اختیار میں آتا ہے، جبکہ یہ 16 کور کی آپریشنل باؤنڈری سے بھی متصل ہے۔
ذرائع کے مطابق یہ جھڑپ بسنت گڑھ کے علاقہ دودو میں پیش آئی جہاں دونوں جانب سے فائرنگ کا تبادلہ جاری ہے۔ سیکیورٹی فورسز کی بھاری نفری موقع پر روانہ کر دی گئی ہے اور علاقے کا محاصرہ مزید سخت کر دیا گیا ہے۔ حکام کا کہنا ہے کہ مشتبہ عسکریت پسندوں کی موجودگی کی اطلاع پر آپریشن شروع کیا گیا تھا۔ تاحال کسی جانی نقصان کی اطلاع موصول نہیں ہوئی، جبکہ مزید تفصیلات کا انتظار ہے۔
فوج کے حکام کے مطابق آپریشن مخصوص انٹیلی جنس ان پٹ کے بعد شروع کیا گیا۔ انہوں نے بتایا کہ ابتدائی معلومات سے پتہ چلتا ہے کہ علاقے میں کم از کم دو عسکریت پسندوں کو دیکھا گیا ہے۔ حکام نے مزید کہا کہ گھنے جنگلاتی علاقہ میں عسکریت پسندوں کے گھات لگاکر حملہ کرنے کے امکانات کے پیش نظر سیکورٹی فورسز احتیاط کے ساتھ آگے بڑھ رہی ہیں۔
اطلاعات کے مطابق تصادم گھنے جنگل کے درمیان ایک اونچائی والے علاقے میں شروع ہوا۔ تازہ انکاؤنٹر پہلگام دہشت گردانہ حملے کے دو دن بعد شروع ہوا جس میں 26 لوگوں کی جانیں گئیں، جن میں زیادہ تر سیاح تھے۔
