امت نیوز ڈیسک //
نئی دہلی : پاکستان کے ساتھ سرحد پر کشیدگی کے درمیان دہلی میں بڑی ہلچل دیکھنے کو مل رہی ہے۔ وزیر دفاع راج ناتھ سنگھ، وزیر خارجہ ایس جے شنکر، قومی سلامتی کے مشیر (این ایس اے) اجیت ڈوبھال اچانک وزیر اعظم نریندر مودی سے ملاقات کے لیے وزیر اعظم کی رہائش گاہ پہنچے۔ اس اجلاس میں تینوں افواج کے سربراہان نے بھی شرکت کی۔ یہ ملاقات تقریباً ایک گھنٹے تک جاری رہی۔ اس کے بعد بھی راج ناتھ سنگھ کافی دیر تک وزیراعظم مودی کے ساتھ بیٹھے ہوئے تھے ۔ پہلگام حملے کے بعد راج ناتھ سنگھ کی وزیراعظم مودی سے یہ چوتھی ملاقات ہے۔ گزشتہ 12 گھنٹوں میں یہ مسلسل دوسرا موقع ہے جب وزیراعظم مودی راج ناتھ سنگھ سے ملاقات کر رہے ہیں۔ یہ واضح ہے کہ ہندوستان نے کچھ بڑا کرنے کا فیصلہ کر چکا ہے۔
وزیر اعظم نریندر مودی نے بدھ کو کابینہ کمیٹی برائے سیکورٹی کی میٹنگ بھی بلائی ہے۔ پہلگام حملے کے بعد سی سی ایس کی یہ مسلسل دوسری میٹنگ ہوگی۔ سی سی ایس ملک کی سلامتی کے معاملات پر فیصلے کرنے والا اعلیٰ ترین ادارہ ہے۔ وہاں یہ فیصلہ کیا جاتا ہے کہ اس معاملے کو آگے کیسے نمٹنا ہے۔ ایک دن پہلے ہی راج ناتھ سنگھ نے وزیر اعظم نریندر مودی سے ملاقات کی تھی۔ دونوں کے درمیان تقریباً 40 منٹ تک بات چیت ہوئی تھی۔ اس سے پہلے راج ناتھ سنگھ نے سی ڈی ایس اور تینوں فوجوں کے سربراہوں سے ملاقات کی تھی۔ حکومت تمام آپشنز پر غور کر رہی ہے۔ اسی لیے تواتر سے میٹنگیں جاری ہیں۔
