امت نیوز ڈیسک //
سرینگر: جموں و کشمیر کے گرمائی دارالحکومت سرینگر میں واقع شیخ العالم انٹرنیشنل ایئرپورٹ کو دیگر شمال مغربی ہوائی اڈوں کی طرح ’’اگلی اطلاع تک‘‘ سویلین فلائٹس کے لے بند کر دیا گیا ہے۔ یہ فیصلہ بھارت کی جانب سے پاکستان اور پاکستان کے زیر انتظام کشمیر میں ملی ٹینٹ کیمپوں پر جوابی فضائی کارروائی کے بعد لیا گیا ہے۔
بھارت کی اس کارروائی کا کوڈ نام ’’آپریشن سندور‘‘ رکھا گیا ہے، جو کہ پہلگام میں ہوئے حالیہ حملے کے ردعمل میں انجام دی گئی۔
پروازوں کی معطلی سری نگر (SXR)، لیہہ (IXL)، جموں (IXJ)، امرتسر (ATQ)، اور دھرم شالہ (DHM) جیسے اہم ہوائی اڈوں پر کی گئی ہے۔ سرینگر ایئرپورٹ کے ڈائریکٹر جاوید انجم نے بتایا: ’’عملی وجوہات کی بنا پر ایئر فیلڈ آج بند ہے اور کوئی بھی شہری پرواز اڑان نہیں بھرے گی۔
مسافروں سے گزارش ہے کہ وہ اپنی ایئر لائن سے تازہ ترین معلومات حاصل کریں۔‘‘ دوسری جانب، سرینگر میں موجود دفاعی حکام نے بتایا ہے کہ ’’بھارتی فضائیہ نے اگلی اطلاع تک سرینگر ایئرپورٹ کا کنٹرول سنبھال لیا ہے۔ ایئر فیلڈ شہری پروازوں کے لیے دستیاب نہیں ہوگی۔‘‘
ایئر انڈیا اور دیگر ایئر لائنز نے سرینگر، جموں، لیہہ، امرتسر، جودھپور، بھُج، جام نگر، چندی گڑھ، اور راجکوٹ سے آنے جانے والی تمام پروازیں دوپہر 12 بجے تک معطل کر دی ہیں اور مزید اپ ڈیٹس ایوی ایشن حکام کی ہدایات پر دی جائیں گی۔
