امت نیوز ڈیسک //
سری نگر: پی ڈی پی صدر اور سابق وزیر اعلیٰ محبوبہ مفتی نے جموں و کشمیر کے پہلے نائب وزیر اعلیٰ مرزا محمد افضل بیگ کو ان کی 43 ویں برسی پر شاندار خراج عقیدت پیش کیا ہے۔انہوں نے کہا: ‘مرزا افضل بیگ صاحب محض ایک سیاستدان نہیں تھے بلکہ جموں و کشمیر کے لوگوں کے لیے امید اور وقار کی کرن تھے’۔
محبوبہ مفتی نے اپنے ایک بیان میں کہا کہ مرحوم بیگ صاحب کی دور اندیشی، دیانتداری اور انصاف کے لیے غیر متزلزل عزم نے زندگیوں کو بدل دیا اور ایک مساوی معاشرے کی بنیاد رکھی۔انہوں نے کہا کہ زمینی اصلاحات میں ان کے یادگار کردار نے بے آواز لوگوں کو آواز فراہم کی۔ان کا کہنا ہے: ‘مرزا افضل بیگ صاحب کی زندگی ہمیں یاد دلاتی ہے کہ حقیقی قیادت پسماندہ لوگوں کی بہتری اور افہام و تفہیم کے پل تعمیر کرنے کے بارے میں ہے’۔
پی ڈی پی صدر نے بتایا: ‘جموں و کشمیر کی عوامی زندگی میں ان کی شراکت ہمارے لیے رہنمائی کی حیثیت رکھتی ہے، کیونکہ ہم ان مشکل وقتوں میں اپنے لوگوں کے وقار، انصاف اور امید کی بحالی کے لیے جدوجہد کرتے ہیں جہاں مستقبل کے ہر مشکل وقت میں ان کی یاد ہمارے لیے ایک آواز ہے’۔انہوں نے کہا: ‘ انصاف اور لوگوں کے حقوق کے لیے ان کی غیر متزلزل وابستگی نسلوں کو متاثر کرتی رہے گی’۔
