امت نیوز ڈیسک //
منجاکوٹ کے تعلیمی زون میں واقع گورنمنٹ مڈل اسکول نار حیات پورا گزشتہ رات شدید بارشوں کے بعد آنے والی خطرناک لینڈ سلائیڈنگ کی زد میں آ گیا۔ پہاڑی کا ایک بڑا حصہ اسکول کی پچھلی جانب سے کھسک کر اسکول کی عمارت پر آ گرا، جس کے نتیجے میں کئی کلاس رومز اور اسکول کی دیواریں زمین بوس ہو گئیں۔
یہ حادثہ اسکول کے اوقات کار کے بعدپیش آیا، ورنہ ایک بڑا سانحہ پیش آ سکتا تھا۔ تاہم اسکول کی موجودہ صورتحال انتہائی تشویشناک ہے۔
مزید بارشوں کی صورت میں عمارت مکمل طور پر منہدم ہونے کا خدشہ ظاہر کیا جا رہا ہے۔
آج بھی طلباء کو تعلیمی سرگرمیوں میں شدید مشکلات کا سامنا کرنا پڑا کیونکہ پانی کلاس رومز میں داخل ہو چکا ہے۔ بچے گیلے فرش پر بیٹھنے پر مجبور ہیں۔
اساتذہ، والدین، طلباء اور مقامی عوام کی جانب سے متعلقہ انتظامیہ سے فوری مطالبہ کیا گیا ہے کہ:اسکول کا ہنگامی معائنہ کر کے رپورٹ تیار کی جائے۔مزید مرمت اور تعمیر نو کا عمل ترجیحی بنیادوں پر شروع کیا جائے۔ وہیں والدین کی طرف سے مانگ کی گئی کہ اگر ممکن ہو تو طلباء کے لیے عارضی متبادل تعلیمی بندوبست کیا جائے۔
یہ واقعہ تعلیمی ڈھانچے کی طرف توجہ مبذول کرانے کا ایک واضح اشارہ ہے۔ ضرورت اس بات کی ہے کہ ایسے اسکول جو پہاڑی یا خطرناک علاقوں میں قائم ہیں، ان کا تفصیلی سروے کر کے فوری حفاظتی اقدامات کیے جائیں۔
