امت نیوز ڈیسک /
نئی دہلی، 02 اکتوبر: وزارتِ خارجہ نے جمعرات کو کہا کہ بھارت اور چین کے درمیان براہِ راست فضائی خدمات اس ماہ کے آخر تک دوبارہ شروع ہوں گی۔ دونوں ممالک کے درمیان پروازیں کووِڈ-19 وباء کے بعد سال 2020 میں معطل کر دی گئی تھیں۔ مشرقی لداخ میں سرحدی تنازعے کے باعث یہ خدمات بحال نہیں ہو سکی تھیں۔
وزارتِ خارجہ نے کہا کہ اب اس بات پر اتفاق ہو گیا ہے کہ بھارت اور چین کے درمیان مخصوص مقامات کو جوڑنے والی براہِ راست پروازیں اکتوبر کے آخر تک بحال کی جا سکتی ہیں، بشرطیکہ دونوں ممالک کی نامزد ایئر لائنز کا تجارتی فیصلہ اور تمام آپریشنل تقاضے پورے ہوں۔
بیان میں مزید کہا گیا کہ رواں سال کے آغاز سے ہی دونوں ممالک کے سول ایوی ایشن حکام کے درمیان تکنیکی سطح کی بات چیت جاری تھی تاکہ براہِ راست فضائی خدمات کی بحالی اور ایئر سروسز معاہدے میں نظرِ ثانی پر اتفاق رائے قائم کیا جا سکے۔
