امت نیوز ڈیسک //
سری نگر، 17 دسمبر : حکومتِ جموں و کشمیر نے سنتوش ٹرافی 2025 کے 79ویں نیشنل فٹبال چیمپئن شپ میں شرکت کے لیے جموں و کشمیر فٹبال ٹیم کے انتخابی عمل کی باضابطہ جانچ کے احکامات جاری کر دیے ہیں۔
جموں میں اس وقت ایک بڑا تنازعہ کھڑا ہو گیا جب سنتوش ٹرافی کے لیے منتخب حتمی ٹیم میں جموں صوبے سے ایک بھی کھلاڑی شامل نہیں کیا گیا۔ اس فیصلے پر سابق فٹبالرز، کلب عہدیداران، کھیل تنظیموں اور سیاسی قائدین نے شدید ناراضگی کا اظہار کرتے ہوئے انتخابی عمل کو جانبدار، غیر شفاف اور تاریخ میں پہلی بار ایسا واقعہ قرار دیا ہے۔
حکومتی حکم نامہ نمبر 50-JK(YSS) آف 2025، مورخہ 17 دسمبر 2025 کے مطابق، جو کمشنر/سیکریٹری یوتھ سروسز اینڈ اسپورٹس ڈیپارٹمنٹ کی جانب سے جاری کیا گیا، ایک انکوائری کمیٹی تشکیل دی گئی ہے جو انتخابی عمل کی تفصیلی اور وقت مقررہ کے اندر جانچ کرے گی اور حقائق سامنے لائے گی۔
اس کمیٹی کی سربراہی انورا دھا گپتا، جے کے اے ایس، ڈائریکٹر جنرل یوتھ سروسز اینڈ اسپورٹس جموں و کشمیر کریں گی۔ کمیٹی کے دیگر اراکین میں منصور اسلم چوہدری (اسپیشل سیکریٹری، فوڈ، سول سپلائیز اینڈ کنزیومر افیئرز)، منوج پربھاکر (جوائنٹ کنٹرولر، لیگل میٹرولوجی)، میگھا بوجیا (ڈپٹی ڈائریکٹر پلاننگ/ایکٹیویٹیز)، ستپال سنگھ (سابق ڈویژنل اسپورٹس آفیسر اور سابق چیف کوچ) اور بلال رسول پرے (فزیکل ایجوکیشن ٹیچر، ضلع بڈگام) شامل ہیں۔
اس کے علاوہ ڈائریکٹر جنرل یوتھ سروسز اینڈ اسپورٹس کو اختیار دیا گیا ہے کہ وہ کمیٹی میں دو سابق قومی سطح کے فٹبالرز، ایک کشمیر اور ایک جموں ریجن سے، شریک کر سکیں۔
حکومتی حکم کے مطابق، کمیٹی انتخابی عمل میں اختیار کیے گئے طریقۂ کار کا باریک بینی سے جائزہ لے گی، اپنی سفارشات مرتب کرے گی اور سات دن کے اندر رپورٹ پیش کرے گی۔ اس کے ساتھ ساتھ عام عوام سے آراء اور تجاویز بھی طلب کی جائیں گی، جس کے لیے کمیٹی جموں اور سری نگر میں تین تین مقررہ دنوں پر اجلاس منعقد کرے گی۔
واضح رہے کہ جموں و کشمیر فٹبال ٹیم نے سنتوش ٹرافی 2025 میں اپنی مہم کا آغاز پنجاب کے مہل پور میں پہلے کوالیفائر میچ میں لداخ کے خلاف شاندار 0-3 فتح کے ساتھ کیا۔ جے اینڈ کے کا دوسرا کوالیفائر میچ 17 دسمبر کو ہماچل پردیش کے خلاف جبکہ تیسرا اور اہم میچ 19 دسمبر کو میزبان پنجاب کے خلاف کھیلا جائے گا۔
