امت نیوز ڈیسک //
سرینگر: وزیر اعلی عمر عبداللہ نے منگل کے روز وسطی کشمیر کے ضلع بڈگام کے گلوَن پورہ علاقے میں کمسن لڑکی کے غمزدہ اہلِ خانہ سے ملاقات کرکے تعزیت کا اظہار کیا اور واقعہ میں ملوث ملزم کے خلاف سخت کارروائی کی یقین دہانی کرائی۔
وزیر اعلیٰ اپنے پارٹی کارکنوں کے ہمراہ متاثرہ خاندان کے گھر پہنچے، جہاں انہوں نے اہلِ خانہ کے ساتھ ہمدردی کا اظہار کرتے ہوئے کہا کہ یہ افسوسناک واقعہ پوری کشمیری سوسائٹی کے ضمیر کو جھنجھوڑ دینے والا ہے۔ انہوں نے کہا کہ ایسے سنگین جرائم کی مہذب معاشرے میں کوئی جگہ نہیں اور حکومت متاثرہ خاندان کو ہر ممکن انصاف فراہم کرے گی۔
عمر عبداللہ نے یقین دلایا کہ اس واردات میں ملوث افراد کے خلاف قانون کے مطابق فوری اور سخت کارروائی عمل میں لائی جائے گی اور کسی بھی مجرم کو بخشا نہیں جائے گا۔
واضح رہے کہ بڈگام کے گلوَن پورہ گاؤں میں 12 سالہ لڑکی 23 مئی 2026 کو لاپتہ ہوگئی تھی، جس کی لاش اگلی صبح اس کے گھر سے تقریباً 200 میٹر دور برآمد کی گئی۔ اس دل دہلا دینے والے واقعہ کے بعد پورے کشمیر میں غم و غصے کی لہر دوڑ گئی۔
پولیس نے معاملے کی تحقیقات کے لیے خصوصی تحقیقاتی ٹیم تشکیل دی ہے۔ حکام کے مطابق ایک مقامی نوجوان مدثر احمد میر کو گرفتار کیا گیا ہے، جس نے دورانِ تفتیش جرم کا اعتراف کیا ہے۔
پولیس کا کہنا ہے کہ کیس کی مزید تحقیقات جاری ہیں اور تمام پہلوؤں کا باریک بینی سے جائزہ لیا جا رہا ہے۔
