امت نیوز ڈیسک //
بڈگام، 26 مئی: پولیس نے منگل کو کہا کہ گلوان پورہ، بڈگام کی کمسن بچی کے قتل کیس کی تحقیقات کے دوران ابتدائی میڈیکو لیگل، فارنزک اور شواہد سے متعلق تمام ضروری کارروائیاں مکمل کر لی گئی ہیں۔
پولیس کے مطابق ایف آئی آر نمبر 139/2026، پولیس اسٹیشن بڈگام کے تحت درج اس معاملے میں گرفتار ملزم کی شناخت اور تفصیلات ابتدائی مرحلے میں اس لیے ظاہر نہیں کی گئی تھیں کیونکہ کئی اہم قانونی کارروائیاں زیرِ عمل تھیں اور شواہد و قانونی عمل پر اثر پڑنے کا خدشہ تھا۔
تمام قانونی تقاضے مکمل ہونے کے بعد پولیس نے ملزم کی شناخت مدثر احمد میر ولد غلام نبی میر، ساکن گلوان پورہ سیب دان، بڈگام کے طور پر ظاہر کی ہے۔
پولیس بیان میں کہا گیا ہے کہ اب تک کی تحقیقات سے یہ بات ثابت ہوئی ہے کہ اس جرم میں کسی اور فرد کے ملوث ہونے کے شواہد نہیں ملے اور ملزم نے اکیلے ہی واردات انجام دی۔
بڈگام پولیس نے عوام سے اپیل کی ہے کہ وہ امن، فرقہ وارانہ ہم آہنگی اور قانون و نظم برقرار رکھنے میں تعاون کریں اور افواہوں، قیاس آرائیوں یا غیر مصدقہ معلومات پھیلانے سے گریز کریں۔
پولیس نے خبردار کیا کہ سوشل میڈیا یا کسی بھی پلیٹ فارم پر غلط معلومات پھیلانے، عوام کو اشتعال دلانے یا امن و امان میں خلل ڈالنے کی کوشش کرنے والوں کے خلاف قانون کے مطابق سخت کارروائی کی جائے گی۔
پولیس نے میڈیا اداروں اور سوشل میڈیا صارفین سے بھی ذمہ داری اور احتیاط کا مظاہرہ کرنے کی اپیل کی ہے تاکہ غیر مصدقہ خبروں کے باعث عوامی بے چینی اور امن و امان کی صورتحال متاثر نہ ہو۔
