امت نیوز ڈیسک //
نئی دہلی، 12 جون: مرکزی وزیر داخلہ امیت شاہ آج نئی دہلی میں ایک اعلیٰ سطحی اجلاس کی صدارت کریں گے جس میں آئندہ شری امرناتھ جی یاترا 2026 کے لیے کیے گئے انتظامات اور تیاریوں کا تفصیلی جائزہ لیا جائے گا۔
ذرائع کے مطابق اجلاس میں یاترا کے دوران سکیورٹی انتظامات، لاجسٹک سہولیات اور مختلف اداروں کے درمیان باہمی رابطے پر تبادلہ خیال کیا جائے گا تاکہ یاتریوں کو محفوظ اور پُرامن ماحول فراہم کیا جا سکے۔ اس سال امرناتھ یاترا 3 جولائی سے شروع ہو کر 28 اگست تک 57 دن جاری رہے گی۔
اجلاس میں قومی سلامتی کے مشیر اجیت دوول، جموں و کشمیر کے لیفٹیننٹ گورنر ، آرمی چیف اور سی آر پی ایف کے ڈائریکٹر جنرل سمیت متعدد اعلیٰ سکیورٹی اور انتظامی حکام شرکت کریں گے۔
حکام کے مطابق اجلاس میں سکیورٹی فورسز کی تعیناتی، نگرانی کے جدید نظام، انٹیلی جنس رابطہ کاری اور ہنگامی صورتحال سے نمٹنے کے اقدامات کا بھی جائزہ لیا جائے گا، کیونکہ یاترا ایک حساس علاقے سے گزرتی ہے۔
ادھر انتظامیہ نے سکیورٹی وجوہات کی بنا پر یکم جولائی سے یاترا کے اختتام تک پہلگام اور بالتل سمیت تمام یاترا راستوں کو نو فلائنگ زون قرار دیا ہے۔ اس دوران یاتریوں کے لیے ہیلی کاپٹر سروس دستیاب نہیں ہوگی اور زائرین کو پیدل، گھوڑوں یا پالکیوں کے ذریعے مقدس غار تک پہنچنا ہوگا۔
