امت نیوز ڈیسک//
گلمرگ ڈیولپمنٹ اتھارٹی نے سیاحتی مقام گلمرگ میں ٹریفک کے بڑھتے ہوئے دباؤ کو کم کرنے اور ماحول دوست سیاحت کو فروغ دینے کے مقصد سے آزمائشی بنیادوں پر اوڈ-ایون ٹریفک نظام کامیابی کے ساتھ نافذ کر دیا ہے۔س منصوبے کا افتتاح چیف ایگزیکٹو آفیسر گلمرگ ڈیولپمنٹ اتھارٹی طارق حسین نائیک کی نگرانی میں کیا گیا۔ انہوں نے کہا کہ اس اقدام کا مقصد ٹریفک جام میں کمی، آمدورفت کو بہتر بنانا، سیاحوں اور مقامی باشندوں کو بہتر سہولیات فراہم کرنا اور گلمرگ کے نازک قدرتی ماحول کا تحفظ یقینی بنانا ہے۔
سی ای او نے کہا کہ سیاحتی سیزن کے دوران گلمرگ میں بڑی تعداد میں سیاحوں کی آمد کے باعث ٹریفک جام، پارکنگ کے مسائل اور ماحولیاتی خدشات پیدا ہوتے ہیں۔ ان کے مطابق اوڈ-ایون ٹریفک فارمولہ گاڑیوں کی منظم نقل و حرکت کو یقینی بنائے گا، ٹریفک کے دباؤ کو کم کرے گا اور سیاحوں کو آسان اور خوشگوار سفری تجربہ فراہم کرے گا۔
انہوں نے سیاحوں، ٹرانسپورٹ آپریٹروں، ہوٹل مالکان، گھوڑا بانوں، تاجروں اور دیگر متعلقہ فریقوں سے اپیل کی کہ وہ اس آزمائشی منصوبے کو کامیاب بنانے کے لیے مکمل تعاون کریں۔ انہوں نے کہا کہ اس منصوبے پر عوامی مفاد میں عمل درآمد کیا جا رہا ہے اور عوامی آرائ اور اس کے نتائج کی بنیاد پر وقتاً فوقتاً اس کا جائزہ لیا جائے گا۔
طارق حسین نائیک نے کہا کہ غیر ضروری گاڑیوں کی آمدورفت میں کمی سے فضائی آلودگی کم ہوگی، گلمرگ کا قدرتی حسن محفوظ رہے گا اور سیاحوں کو بہتر ماحول میسر آئے گا۔ انہوں نے کہا کہ یہ اقدام حکومت کے پائیدار سیاحت کے فروغ اور قدرتی وسائل کے تحفظ کے وژن کے عین مطابق ہے۔مقامی ٹرانسپورٹروں، سیاحتی شعبے سے وابستہ افراد، تاجروں اور رہائشیوں نے اوڈ-ایون ٹریفک نظام کا خیر مقدم کرتے ہوئے اسے بروقت اور مثبت قدم قرار دیا۔ ان کا کہنا تھا کہ اس سے نہ صرف ٹریفک کا مسئلہ کم ہوگا بلکہ مقامی ٹرانسپورٹ نظام مزید منظم ہونے سے روزگار کے بہتر مواقع بھی پیدا ہوں گے۔
سی ای او نے ملک بھر سے آنے والے سیاحوں سے اپیل کی کہ وہ اوڈ-ایون ٹریفک ضابطے پر سختی سے عمل کریں اور گلمرگ کو مزید صاف، سرسبز اور سیاح دوست بنانے کی کوششوں میں انتظامیہ کا بھرپور ساتھ دیں۔ انہوں نے امید ظاہر کی کہ یہ آزمائشی منصوبہ پائیدار ٹریفک نظام کے لیے ایک مثالی ماڈل ثابت ہوگا اور سیاحوں کو زیادہ آرام دہ اور خوشگوار سفری تجربہ فراہم کرے گا۔
