امت نیوز ڈیسک //
سرینگر، 7 جولائی: سابق چیئرپرسن ضلع ترقیاتی کونسل (ڈی ڈی سی) بارہمولہ اور پی ڈی پی کے بانی رہنماؤں میں شامل مظفر حسین بیگ کی اہلیہ صفینہ بیگ نے بدھ کے روز اپنے حامیوں سمیت نیشنل کانفرنس میں شمولیت اختیار کر لی۔
سرینگر میں واقع پارٹی ہیڈکوارٹر میں منعقدہ تقریب کے دوران نیشنل کانفرنس کے صدر ڈاکٹر فاروق عبداللہ، وزیر اعلیٰ عمر عبداللہ، دیہی ترقی کے وزیر جاوید احمد ڈار، علی محمد ساگر، چودھری محمد رمضان سمیت دیگر سینئر رہنماؤں نے صفینہ بیگ کا پارٹی میں خیرمقدم کیا۔
سیاسی حلقوں کے مطابق صفینہ بیگ کی شمولیت کو ضلع بارہمولہ میں نیشنل کانفرنس کے لیے ایک اہم تقویت قرار دیا جا رہا ہے۔ مظفر حسین بیگ پی ڈی پی کے بانی رہنماؤں میں شمار ہوتے ہیں اور وہ ماضی میں نائب وزیر اعلیٰ بھی رہ چکے ہیں۔ انہوں نے 2002 اور 2008 کے اسمبلی انتخابات کے علاوہ 2014 کا لوک سبھا انتخاب بھی بارہمولہ سے جیتا تھا۔
