امت نیوز ڈیسک //
سرینگر، 14 جولائی: جموں و کشمیر حج کمیٹی نے اہل افراد سے اپیل کی ہے کہ وہ 20 جولائی 2026 کی آخری تاریخ سے پہلے حج 2027 کے لیے اپنی درخواستیں جمع کرائیں، کیونکہ اب تک 8 ہزار کے کوٹے کے مقابلے میں صرف تقریباً 2,300 درخواستیں موصول ہوئی ہیں۔
حج کمیٹی کے چیف ایگزیکٹو آفیسر ڈاکٹر شجاعت احمد قریشی نے کہا کہ موصول ہونے والی درخواستوں کی تعداد توقعات سے کہیں کم ہے۔ انہوں نے کہا کہ صرف وہی افراد درخواست دے سکتے ہیں جن کے پاس کارآمد پاسپورٹ موجود ہو۔
انہوں نے عوام سے اپیل کی کہ وہ اپنے رشتہ داروں، دوستوں اور دیگر خواہشمند عازمین کو بھی بروقت درخواست دینے کی ترغیب دیں تاکہ کوئی اہل شخص اس موقع سے محروم نہ رہے۔ ساتھ ہی آخری وقت میں درخواست جمع کرانے سے گریز کرنے کا بھی مشورہ دیا۔
واضح رہے کہ 2025 میں جموں و کشمیر سے 4,351 عازمین نے حج ادا کیا تھا، جبکہ اس سال 8 ہزار کے کوٹے کے باوجود اب تک صرف تقریباً 2,300 درخواستیں موصول ہوئی ہیں۔ (کے این او)
