امت نیوز ڈیسک //
سرینگر، 14 جولائی : جموں و کشمیر نیشنل کانفرنس کے ایڈیشنل جنرل سیکریٹری، سینئر رہنما اور سابق وزیر ڈاکٹر شیخ مصطفیٰ کمال منگل کو مختصر علالت کے بعد انتقال کر گئے۔
ڈاکٹر مصطفیٰ کمال کئی دہائیوں سے نیشنل کانفرنس سے وابستہ تھے اور جموں و کشمیر کی سیاسی و عوامی زندگی میں اہم کردار ادا کرتے رہے۔ ان کے انتقال کی خبر پھیلتے ہی سیاسی، سماجی اور عوامی حلقوں میں غم کی لہر دوڑ گئی۔
مختلف سیاسی جماعتوں کے رہنماؤں، کارکنوں اور سماج کے مختلف طبقات سے تعلق رکھنے والے افراد نے ڈاکٹر مصطفیٰ کمال کے انتقال پر گہرے رنج و غم کا اظہار کرتے ہوئے سوگوار خاندان سے تعزیت کی۔ رہنماؤں نے انہیں عوامی خدمت، پارٹی سے وابستگی اور جموں و کشمیر کے عوام کے لیے ان کی خدمات پر خراجِ عقیدت پیش کیا۔
نیشنل کانفرنس نے بھی اپنے ایڈیشنل جنرل سیکریٹری کے انتقال پر گہرے دکھ کا اظہار کرتے ہوئے اسے پارٹی اور جموں و کشمیر کے عوام کے لیے ایک بڑا نقصان قرار دیا۔
ڈاکٹر مصطفیٰ کمال کی نمازِ جنازہ اور تدفین سے متعلق تفصیلات کا اعلان اہل خانہ کی جانب سے بعد میں کیے جانے کی توقع ہے۔
