(اننت ناگ) ہفت روزہ ”شہاب“ کے بانی ایڈیٹر مرحوم قاسم سجاد کو خراج عقیدت ادا کرنے کے مقصد سے اتوار کو ٹاون ہال اننت ناگ میں تقریب منعقدکی گئی جس میں شہاب کا خصوصی میگزین ایڈیشن جاری کیا گیا۔ اننت ناگ ورکنگ جرنلسٹس ایسوسی ایشن اور مراز ادبی سنگم کے اشتراک سے اننت ناگ کے ٹاؤن ہال میں منعقدہ اس کانفرنس میں وادی کے معروف ادیبوں، شاعروں اور صحافیوں نے شرکت کی۔ تقریب کی صدار ت سابق جسٹس اور دانشوربشیر احمد کرمانی نے کی جبکہ سرکردہ ادیب اور ساہتیہ اکادمی کے ایڈوائزری بورڈ برائے کشمیر کے کنوینر غلام نبی آتش تقریب میں بحیثیت مہمان خصوصی موجود تھے۔ سینئر صحافی اور ایڈیٹر چٹان طاہرمحی الدین، ممتاز شاعر علی شیدا، معروف ادیب و صحافی زاہد مختار اور کشمیر یونیورسٹی کے شعبہ صحافت کے سابق سربراہ ناصر مرزا، راجا یوسف نے تقریب میں مہمانانِ ذی وقار کی حیثیت سے شرکت کی۔ سینئر صحافی اور بی بی سی کے نمائندے ریاض مسرور نے تقریب کی نظامت کے فرائض انجام دئے۔ اس موقع پر قاسم سجاد کی یاد میں ہفتہ روزہ ”شہاب“ کے ایک خصوصی میگزین ایڈیشن کا اجرا کیا گیا۔ اس خصوصی شمارے میں سرکردہ دانشوروں اور صحافیوں کے وہ شذرات شامل اشاعت ہیں، جن میں مرحوم قاسم سجاد کی صحافتی زندگی کے مختلف گوشوں پر روشنی ڈالی گئی ہے اور ان کی خدمات پر انہیں خراج تحسین ادا کیا گیا ہے۔ سینئیر صحافی اور اننت ناگ ورکنگ جنرلسٹ ایسوسیشن کے صدر ایس طارق نے کہا کہ جنوبی ضلع اننت ناگ کے سرنل سے تعلق رکھنے والے مرحوم قاسم سجاد ایک بے باک اور بے لا گ قلمکار تھے، جنہوں نے اپنی پوری زندگی بہادری کے ساتھ صحافت کی آبیاری کی اور ہمیشہ سچائی کی طرفداری کی۔ مرحوم نے انتہائی ناسازگار حالات میں بھی اپنے قلم کو گروہی رکھنے سے انکار کیا اور بہادری کے ساتھ حالات کا مقابلہ کیا۔ سینئر صحافی اور ایڈیٹر چٹان طاہر محی الدین نے اپنے خطاب میں کہا کہ قاسم سجاد کبھی بھی سچ کو جھوٹ اور جھوٹ کو سچ کہنے کے روادار نہیں تھے بلکہ وہ ہمیشہ بہادری کے ساتھ حقائق کو پیش کرتے رہے ہیں۔ جسٹس بشیر احمد کرمانی نے اپنے صدارتی خطاب میں کہا کہ مرحوم قاسم سجاد جموں و کشمیر کے صحافیوں کے لئے ایک نقش پا چھوڑ گئے ہیں، جس پر چل کر صحافت کے بنیادی اصولوں کی پاسداری کرتے ہوئے حق کی ترجمانی کی جاسکتی ہے۔ انہوں نے کہا تقریب میں موجود ممتاز شخصیات اور عام لوگوں کی بڑی تعداد کو دیکھ ہی یہ اندازہ لگایا جاسکتا ہے کہ قاسم سجاد کتنے مقبول صحافی تھے۔
