(سرینگر) حکام نے آج مسلسل ایک بار پھر مرکزی جامع مسجد سرینگر میں نماز جمعہ کی ادائیگی پر بندش عاید کی. انجمن اوقاف جامع مسجد کی جانب سے ایک بیان میں کہا گیا ہے کہ 26ویں جمعتہ المبارک کو کشمیر کی سب سے بڑی عبادت گاہ اور دعوت و تبلیغ کے مرکز جامع مسجد سرینگر میں مسلمانان کشمیر کو نماز جمعہ جیسے اہم فریضے کی ادائیگی کی اجازت نہ دیکر مسلمانان کشمیر کے دینی اورمذہبی جذبا ت کو شدید ٹھیس پہنچانے کا عمل جاری رکھا گیا ہے جو ہر لحاظ سے قابل مذمت ہے۔ انجمن نے میرواعظ مولوی محمد عمر فاروق کی مسلسل نظر بندی پر بھی تشویش کا اظہار کیا ہے. بیان میں انجمن نے اس امرکو حد درجہ تکلیف دہ اور اذیت ناک قرار دیا کہ سربراہ انجمن میرواعظ مولوی محمد عمر فاروق کو 5اگست2019 سے لگاتار نظر بند رکھا گیا ہے اور اس طرح موصوف کی منصبی ذمہ داریوں کے ساتھ ساتھ پر امن سرگرمیوں پر بھی قدغن عائد ہے۔بیان میں کہا گیا کہ حکام کو چاہئے کہ وہ حقائق کا اعتراف کرتے ہوئے نہ صرف جامع مسجد کو نماز جمعہ کیلئے کھول دے بلکہ جناب میرواعظ کی رہائی یقینی بنائے۔
