سری نگر// پولیس نے فوج کے ساتھ مل کر جمعہ کو دعویٰ کیا کہ شمالی کشمیر کے بارہمولہ میں لشکر طیبہ سے منسلک دو جنگجووں کو گرفتار کیا گیا ہے اور ان کے پاس سے اسلحہ اور گولہ بارود سمیت "مجرمانہ مواد” برآمد کیا گیا ہے۔
پولیس کے ایک ترجمان نے کہا، "ایک مخصوص اطلاع پر فوری کارروائی کرتے ہوئے، پولیس نے فوج کے ساتھ مل کر کالعدم عسکری تنظیم لشکر طیبہ کے 02 سرگرم جنگجووں کو گرفتار کیا جن کی شناخت ارشاد احمد میر ولد عبدالرحمٰن میر اور زاہد بشیر ولد بشیر احمد کے طورہوئی، دونوں بارہمولہ کے نہال پورہ پٹن علاقہ کے رہائشی ہیں”۔
انہوں نے مزید کہا ، "ان کے قبضے سے مجرمانہ مواد، گولہ بارود سمیت 02 چائنیز پستول، 18 زندہ راونڈز اور 02 میگزین برآمد ہوئے ہیں”۔
پولیس نے قانون کی متعلقہ دفعات کے تحت مقدمہ درج کرلیا ہے۔
