امت نیوز ڈیسک // پولیس نے اتوار کو البدر تنظیم سے وابستہ تین اعانت کاروں کو ہندواڑہ کے کرال گنڈ علاقے میں واگام کراسنگ پر گرفتار کرنے اور ان سے اسلحہ اور گولہ بارود برآمد کرنے کا دعویٰ کیا ہے۔
ایک سینئر پولیس افسر نے مقامی نیوز ایجنسی کو بتایا کرالگنڈ پولیس چوکی، 92 سی آر پی ایف اور 32 آر آر کی ایک مشترکہ پارٹی نے واگام کراسنگ پر تین افراد کو روکا۔ ابتدائی پوچھ گچھ پر تینوں افراد کی شناخت ناظم احمد بھٹ ولد غلام محمد بھٹ، سراج الدین خان ولد بشیر احمد خان اور عادل گل ولد غلام محی الدین وانی کے طور پر کی گئی ہے- سبھی کھائی پورہ، کرالگنڈ کے رہنے والے ہیں۔تلاشی کے دوران انکے قبضے سے ایک پستول کے ساتھ ایک میگزین اور آٹھ راؤنڈز کے علاوہ دو دستی بم برآمد ہوئے۔
پولیس کے مطابق ابتدائی تحقیقات سے پتہ چلا ہے کہ تینوں کا تعلق البدر سے ہے، اور یہ کہ انہیں پاکستان میں مقیم ہینڈلرز نے علاقے میں عسکریت پسندانہ کارروائیاں انجامِ دینے کا کام سونپا تھا۔ کیس درج کر کے مزید تفتیش شروع کر دی گئی ہے۔
