سری نگر: آئی جی پولیس وجے کمار نے کہا ہے کہ سوشل میڈیا پر کئی ایسے افراد سرگرم ہوگئے ہیں جو کہ فرضی اکاؤنٹ بنا کر لوگوں سے دھوکہ دہی کر کے ان سے رقومات اینٹ لیتے ہیں۔ ایڈوائزری جاری کرتے ہوئے آئی جی پی نے اپنے ایک ٹویٹ پیغام کے ذریعے عام لوگوں سے کہا ہے کہ ایسے عناصر سرکاری افسران کی تصویریں انٹرنیٹ سے حاصل کرتے ہیں اور جعلی سم کارڈ پر واٹس ایپ اکاؤنٹ بناتے ہیں۔ پھر کسی سرکار افسر کی تصویر کو واٹس ایپ نمبر پر ڈسپلے تصویر کے طور پر اپ لوڈ کردیتے ہیں۔
آئی جی پی نے کہا ہے کہ ایسے فراڈی افراد ان تصویروں سے عوام کو دھوکہ میں رکھتے ہیں اور عام لوگوں سے مالی یا انتظامی مدد کرنے کی خاطر لوگوں سے رقم منتقل کرنے کے حوالے سے پیغامات بھیجتے رہتے ہیں۔ ایڈوائزری میں عام لوگوں کو ایسے عناصر سے خبردار رہنے کو کہا گیا ہے اور مشورہ دیا گیا ہے کہ وہ احتیاط سے کام لے کر کسی بھی نامعلوم واٹس ایپ صارفین کی جانب سے بھیجے گئے کسی بھی مسیج یا پیغام کا نہ تو کوئی جواب دیں اور نہ ہی رقم کی منتقلی یا آن لائن کوئی گفٹ خریدیں۔
آئی جی پولیس وجے کمار کی جانب سے اس ایڈوائزری میں عام صارفین کو چوکنا رہنے پر زور دیتے ہوئے کہا گیا ہے کہ اپنے کریڈٹ کارڈ، ڈیبٹ کارڈ اور او ٹی پی کے علاوہ لین دین سے منسلک کوئی بھی نمبر یا پاس ورڈ کسی سے شیئر نہ کریں. ۔
