بھارت میں منکی پاکس سے متاثر پہلے مریض کی تشخیص

امت نیوز ڈیسک // بھارت میں منکی پاکس کا پہلا کیس ریاست کیرالا میں رپورٹ ہوا ہے۔ کیرالہ کا یہ رہائشی حال ہی میں متحدہ عرب امارات سے واپس آیا تھا۔

کیرلا کے وزیر صحت وینا جارج نے کہا کہ متحدہ عرب امارات (یو اے ای) سے تین دن پہلے ریاست پہنچنے والے ایک شخص میں منکی پاکس کی علامات ظاہر ہوئی ہیں۔

ذرائع نے بتایا کہ اس کا نمونہ پونے وائرولوجی انسٹی ٹیوٹ کو بھیجا گیا تھا اور اس کی رپورٹ مثبت آئی ہے۔ متاثرہ شخص کو تنہائی میں رکھا گیا ہے۔ کیرالہ کی وزیر صحت وینا جارج نے کہا کہ مریض کے قریبی رابطوں کی بھی نشاندہی کی گئی ہے اور وہ تمام لوگ بھی فی الحال زیر نگرانی ہیں۔ جن میں اس کے والد، والدہ، ایک ٹیکسی ڈرائیور، ایک آٹو ڈرائیور اور ٹیکسی پر بیٹھے 11 ساتھی مسافر شامل ہیں۔ وزیر صحت وینا جارج کا کہنا ہے کہ بیماری کے ابتدائی رابطوں تک پھیلنے کا اندیشہ ہے لیکن گھبرانے کی ضرورت نہیں ہے۔

اس سال، عالمی ادارہ صحت (WHO) نے 39 ممالک سے 1,600 سے زیادہ تصدیق شدہ اور تقریباً 1,500 مشتبہ کیسز رپورٹ کیے ہیں، ڈبلیو ایچ او کے ڈائریکٹر جنرل ٹیڈروس اذانوم گیبریئس نے منگل کو کہا کہ منکی پوکس کا عالمی پھیلاو واضح طور پر غیر معمولی اور تشویشناک ہے۔