سرینگر // بھارت جلد ہی ”سپر پاور “ ملک بنے گا کا دعویٰ کرتے ہوئے مرکزی وزیر ددفاع راجناتھ سنگھ نے کہا کہ ملک کا تحفظ ہماری اولین ترجیح ہے، اور ہم اسے یقینی بنانے کیلئے پوری طرح پرعزم ہیں۔ انہوں نے مزید کہا کہ ”میں پورے وثوق کے ساتھ کہہ سکتا ہوں کہ آنے والے وقتوں میں جب بھی دنیا میں فوجی طاقتوں سمیت سپر پاورز کی بات ہوگی، بھارت کا شمار سب سے پہلے ہوگا“۔ جود پور راجستھان میں بھارتی فضائیہ میں میڈ ان انڈیا لائٹ کمبیٹ ہیلی کاپٹر (ایل سی ایچ) کے پہلے بیچ کی شمولیت کی تقریب کے دوران خطاب کرتے ہوئے وزیر دفاع راجناتھ سنگھ نے کہا کہ ہندوستان جلد ہی سپر پاور میں شمار کیا جائے گا۔انہوں نے مزید کہا ”ہماری ہمیشہ یہ کوشش ہوتی ہے کہ قومی سلامتی کو برقرار رکھنے کے لیے اپنی مسلح افواج کو بہترین آلات اور پلیٹ فارمز سے لیس کریں۔ دنیا میں جو بھی جغرافیائی سیاسی منظر نامہ ہو، قومی سلامتی (اپریٹس) کو ہمیشہ فعال رکھنا ہماری اہم ذمہ داری ہے“ ۔ راجناتھ سنگھ نے کہا کہ ”ایل سی ایچ کو شامل کرنے کے لیے، آدیشکتی مہادورگا کی عبادت کے تہوار، نوراتری سے بہتر شاید ہی کوئی وقت ہو، اور راجستھان کی مٹی سے زیادہ مناسب جگہ شاید ہی کوئی ہو“۔ ایل سی ایچ کی صلاحیتوں کی وضاحت کرتے ہوئے وزیر نے کہا کہ یوکرین کے تنازع نے یہ سکھایا ہے کہ بھاری ہتھیاروں کے نظام اور پلیٹ فارم جو میدان جنگ میں تیز رفتاری سے آگے نہیں بڑھ سکتے بعض اوقات دشمنوں کے لیے آسان ہدف بن جاتے ہیں۔سنگھ نے مزید کہا کہ ایل سی ایچ دشمنوں کو چکما دینے کی صلاحیت رکھتا ہے۔ یہ مختلف قسم کے گولہ بارود لے جا سکتا ہے اور انہیں تیزی سے جگہ پر پہنچا سکتا ہے۔ مختلف علاقوں میں ہماری مسلح افواج کی ضروریات کو پوری طرح پورا کرتا ہے۔ یہ ہماری فوج اور فضائیہ دونوں کے لیے ایک مثالی پلیٹ فارم ہے۔وزیر نے کہا کہ ہلکے جنگی ہیلی کاپٹر کی ضرورت 1999 میں کرگل جنگ کے دوران محسوس کی گئی تھی۔اس کے بعد سے، ایل سی ایچ دو دہائیوں سے ملک کی تحقیق اور ترقی کا نتیجہ ہے۔ آئی اے ایف میں اس کی شمولیت ہماری دفاعی پیداوار میں ایک اہم سنگ میل ہے۔انہوں نے کا کہا کہ قوم کا تحفظ ہماری اولین ترجیح ہے، اور ہم اسے یقینی بنانے کے لیے پوری طرح پرعزم ہیں۔ میں پورے وثوق کے ساتھ کہہ سکتا ہوں کہ آنے والے وقتوں میں جب بھی دنیا میں فوجی طاقتوں سمیت سپر پاورز کی بات ہوگی، بھارت کا شمار سب سے پہلے ہوگا۔
