امت نیوز ڈیسک //
کپوارہ:شمالی کشمیر کے کپوارہ ضلع میں جموں و کشمیر پولیس نے ہفتے کی صبح منشیات کی فروخت میں ملوث دو خواتین کو گرفتار کرنے کا دعویٰ کیا ہے۔ پولیس کا کہنا ہے کہ خواتین کی تحویل سے تین کلوگرام وزنی چرس بھی برآمد کر لیا گیا۔
کپوارہ پولیس کا کہنا ہے کہ منشیات سے متعلق موصول ہوئی ایک خفیہ اطلاع کے بعد پولیس نے ضلع کے سوگام، لولاب میں ایک خصوصی ناکہ قائم کیا اور ایک بس زیر رجسٹریشن نمبر JK01Y-0829 کو روک کر دو خواتین کی ذاتی تلاشی کے دوران ان کی تحویل سے قریب تین کلوگرام وزنی چرس کو برآمد کرکے دونوں خواتین کو حراست میں لے لیا۔
کپوارہ پولیس نے حراست میں لی گئی خواتین کی شناخت پروینہ بیگم زوجہ نذیر احمد لوہار اور سائبہ اختر دختر میر لوہار کے طور پر کی ہے دونوں ورنو، فریسواڑی علاقے کی رہائشی ہیں۔ کپوارہ پولیس کا کہنا ہے کہ ابتدائی تفتیش کے دوران یہ بات سامنے آئی ہے کہ یہ دونوں خواتین منشیات کو سرینگر لے جا رہی تھی۔ پولیس کا کہنا ہے کہ اس کیس میں مزید گرفتاریاں اور بازیابیاں بھی متوقع ہیں۔
پولیس نے اس ضمن میں مقدمہ ایف آئی آر نمبر 72/2022 سیکشن 8/20، 29 این ڈی پی ایس ایکٹ کے تحت پولیس اسٹیشن سوگام میں درج کر کے مزید تحقیقات شروع کر دی ہے۔
