امت نیوز ڈیسک //
سرینگر:مرکزی وزیر برائے پٹرولیم و ہاوسنگ ہردیپ سنگھ پوری نے کہا کہ بھارت کے پہلے وزیر اعظم جواہر لال نہرو نے کشمیر معاملے کو بین الاقوامی فورم پر لے جاکر اور جموں کشمیر کے الحاق میں تاخیر کرکے تاریخی غلطی کی تھی، جس کا پڑوسی ملک (پاکستان) نے غلط فائدہ اٹھاکر یہاں عسکریت پسندی کو پھیلایا۔
موصوف وزیر نے آج سرینگر میں پریس کانفرنس کے دوران پوچھے گئے سوال کا جواب دیتے ہوئے کہا کہ جو ان کے ساتھی مرکزی وزیر کرن رجیجو نے نہرو کے متعلق مضمون لکھا ہے وہ حقیقت پر مبنی ہے۔
یاد رہے کہ مرکزی وزیر قانون کرن رجیجو نے ایک مضمون اور ٹویٹ میں لکھا کہ ملک کے پہلے وزیر اعظم جواہر لال نہرو نے جموں کشمیر کے ملک کے ساتھ الحاق کرنے میں تاخیر کی تھی اور کشمیر معاملے کو اقوام متحدہ میں غلط دفعہ کے تحت لیا تھا۔
ہردیپ سنگھ نے کہا کہ جواہر لال نہرو کی تاریخی غلطی کے سبب ہی کشمیر میں صورتحال بگڑ گئی جس کا پاکستان نے بھی غلط مفاد اٹھایا۔ قابل ذکر ہے کہ آج پی ڈی پی صدر محبوبہ مفتی نے بھی کرن رجیجو کے خیالات پر ردعمل ظاہر کرتے ہوئے کہا کہ اگر جواہر لال نہرو نہیں ہوتے تو جموں کشمیر بھارت کا حصہ نہیں ہوتا۔
