امت نیوز ڈیسک //
سرینگر//عدالت عظمیٰ نے کٹھوعہ عصمت دری کیس میں کلیدی ملزم کو نابالغ ماننے سے انکار کرتے ہوئے کہا کہ سنگرا پربالغ مجرم کی حیثیت سے مقدمہ چلایاجائے گا۔ اس موقعے پر عدالت عظمیٰ نے کہا کہ عمر کم ہونے کی آڑ میں کسی بھی مجرم کو قانون سے پناہ نہیں ملنی چاہئے ۔ سپریم کورٹ نے کٹھوعہ عصمت دری معاملے میں ایک اہم فیصلہ سناتے ہوئے ملزم سنگرا کو واقعہ کے وقت نابالغ ماننے سے انکار کر دیا ہے۔ اب ملزم شبھم سنگرا پر بالغ کی طرح مقدمہ چلایا جائے گا۔ سپریم کورٹ نے نچلی عدالت اور ہائی کورٹ کے فیصلے کو پلٹ دیا اور کہا کہ ملزم شبھم سنگرا کے خلاف مقدمہ بالغ کی حیثیت سے ہی چلے گا۔جسٹس جے بی پاردی والا نے اس معاملے میں اپنا فیصلہ سناتے ہوئے کہا کہ اگر کسی ملزم کی عمر کا تعین کرنے کے لیے کوئی ٹھوس ثبوت نہیں ہے۔ تو ایسی صورت حال میں ‘طبی رائے’ کو درست طریقہ سمجھا جائے گا۔ 7 فروری 2020 کو سپریم کورٹ نے کٹھوعہ عصمت دری کیس کے ایک ملزم پر نابالغوں کی عدالت میں جاری کارروائی پر روک لگا دی تھی۔ جوینائل ایکٹ کے تحت کارروائی روک دی گئی۔ عدالت نے یہ نوٹس جموں و کشمیر حکومت کی طرف سے کی گئی اپیل پر جاری کیا ہے۔ ریاستی حکومت نے ہائی کورٹ کے حکم کے خلاف اپیل کی تھی۔ملزم شبھم سنگرا کو ہائی کورٹ نے نابالغ قرار دیا تھا۔ ہائی کورٹ سے پہلے سی جے ایم کٹھوعہ نے بھی ملزم کو نابالغ مان لیا تھا۔ ریاستی حکومت نے میونسپل اور اسکول کے ریکارڈ کے درمیان فرق کا حوالہ دیا تھا۔ جنوری 2018 میں، چھ افراد پر کٹھوعہ میں ایک 8 سالہ لڑکی کے اغوا، اجتماعی عصمت دری اور قتل کا الزام لگایا گیا تھا۔
