دفعہ 370 منسوخی کے بعد جموں کشمیر ترقی کی راہ پر گامزن ،ہر گھر پر قومی پرچم لہرا رہے ہیں:انوراگ ٹھاکر

امت نیوز ڈیسک //
سرینگر // دفعہ 370 منسوخی کے بعد جموں کشمیر ترقی کی راہ پر گامزن ہونے کے ساتھ ساتھ ہر گھر پر قومی پرچم لہرا رہے ہیں کا دعویٰ کرتے ہوئے مرکزی وزیر اطلاعات و نشریات اور کھیل انوراگ سنگھ ٹھاکر نے کہا کہ خاندانی حکمران اور زمین پر قبضے کی عادت رکھنے والی جماعتیں اب میدان کھو چکی ہیں۔جموں میں کھیلو انڈیا کے تیسرے مرحلے کا آغاز کرنے کے بعد ایک پریس کانفرنس سے خطاب کرتے ہوئے مرکزی وزیر اطلاعات و نشریات اور کھیل انوراگ سنگھ ٹھاکر نے کہا کہ دفعہ 370 کی منسوخی سے جموں و کشمیر کے ہر گھر پر قومی پرچم لہرانے کے ساتھ امن کی واپسی ہوئی ہے۔انہوں نے کہا کہ جموں و کشمیر بھارتیہ جنتا پارٹی (بی جے پی) حکومت کے تحت ترقی کی راہ پر گامزن ہے اور آگے بڑھتا رہے گا۔ ٹھا کر نے مزید کہا کہ دفعہ 370 کی منسوخی کی وجہ سے واپسی ہوئی ہے۔ امن، سرمایہ کاری اور جموں و کشمیر میں سیاحوں کی بڑی آمد، ہر گھر پر قومی پرچم لہرا رہے ہیں۔مرکزی وزیر نے یاد دلایا کہ انہیں 2011 میں کولکتہ سے کشمیر تک ”ترنگا یاترا“ کی قیادت کرتے ہوئے جموں و کشمیر پہنچنے پر جیل بھیج دیا گیا تھا۔انہوں نے کہا کہ جموں و کشمیر بدل چکا ہے اور اب بڑے پیمانے پر ترقی دیکھ رہا ہے۔پی ڈی پی کی صدر اور سابق وزیر اعلیٰ محبوبہ مفتی کی جموں و کشمیر پر بی جے پی کی پالیسیوں پر تنقید پر ایک سوال کا جواب دیتے ہوئے انوراگ ٹھاکر نے کہا، ”کچھ لوگ زمین کھو چکے ہیں کیونکہ وہ خاندانی حکمرانی اور زمینوں پر قبضہ کرنے کے عادی تھے۔ وہ اقتدار سے باہر ہیں اور مایوس ہیں۔“انہوں نے کہا کہ حکومت کے پاس اڈانی مسئلہ پر چھپانے کے لئے کچھ نہیں ہے اور انہوں نے اپوزیشن پارٹیوں پر الزام لگایا کہ وہ "عوام دوست” بجٹ پر بحث سے بچنے کے لئے پارلیمنٹ میں ہنگامہ کھڑا کر رہی ہیں۔بجٹ کی جھلکیوں کے بارے میں میڈیا کو بریفنگ دیتے ہوئے انہوں نے کہا کہ مودی حکومت نے سال 2013-14 میں ملک میں بدعنوانی کی اجازت نہ دینے کا وعدہ کیا تھا۔ ”اس حکومت کے خلاف بدعنوانی کا ایک بھی الزام نہیں ہے جو آٹھ سال سے اقتدار میں ہے۔“”کانگریس نے بدعنوانی کے ذریعے اس ملک کو کھوکھلا کر دیا ہے۔ ہم ایمانداری سے حکومت چلا رہے ہیں اور ملک کو معاشی خوشحالی کی طرف لے کر جائیں گے۔انہوں نے کہا، "ہم نے عوام کو مفت کوویڈ ویکسین اور غریبوں کو کھانا فراہم کیا،” انہوں نے مزید کہا کہ حکومت ٹیکس کے طور پر جمع ہونے والی ہر ایک پائی کو عوام کی فلاح و بہبود کے لیے استعمال کر رہی ہے۔