امت نیوز ڈیسک //
سری نگر: جموں وکشمیر کے ضلع رام بن کے بانہال علاقے میں اتوار کی صبح ضلعی انتظامیہ نے زا ئد از 50 دکانوں کو سیل کیا جبکہ ایک میڈیکل شاپ اور شیڈ کو منہدم کیا گیا۔ضلعی انتظامیہ کے مطابق سرکاری اراضی پر دکانوں کو غیر قانونی طورپر تعمیر کیا گیا تھا لہذا سبھی دکانوں کو سیل کرکے اْنہیں ایم سی بانہال کی تحویل میں دیا گیا۔
اطلاعات کے مطابق اتوار کی صبح بانہال میں ضلعی انتظامیہ نے انسداد تجاوزات مہم کے تحت ہسپتال گلی کے اندر سٹیٹ لینڈ پر تعمیر کئے گئے 50 دکانوں کو سیل کیا۔معلو م ہوا ہے کہ تحصیلدار کی سربراہی میں محکمہ مال کی ٹیم نے پولیس کی بھاری تعیناتی کے بیچ ایک میڈیکل شاپ سمیت دو ڈھانچوں کو منہدم کیا۔
سرکاری ذرائع نے بتایا کہ بانہال کی ہسپتال گلی میں سرکاری اراضی پر دکانیں تعمیر کی گئی تھیں جنہیں سیل کیا گیا ہے۔انہوں نے بتایا کہ زا ئد از 50 دکانوں کو میونسپل کمیٹی بانہال کی تحویل میں دیا گیا اور ان دکانوں کے ساتھ کیا کرنا ہے اس کا فیصلہ بعد میں کیا جائے گا۔دریں اثنا بانہال میں انہدامی کارروائی کے پیش نظر مارکیٹ سنسان اور بازار ویران دکھائی دے رہے تھے۔کسی بھی ناخوشگوار واقعے کو ٹالنے کی خاطر بانہال میں پیرا ملٹری فورسز کی تعیناتی عمل میں لائی گئی ہے۔
بتادیں کہ جموں وکشمیر انتظامیہ نے یونین ٹریٹری میں سرکاری لینڈ کو باز یاب کرنے کی خاطر بڑے پیمانے پر مہم شروع کی ہے اور ابھی تک ہزاروں کنال اراضی کو تحویل میں لیا گیا۔ادھر شمالی ضلع بارہ مولہ کے سوپور میں مقامی لوگوں نے 81 کنال سرکاری اراضی حکام کے حوالے کی۔
اطلاعات کے مطا بق اتوار کے روز سوپور میں مقامی لوگوں نے 81 کنال سرکاری اراضی حکام کے حوالے کی جس کو بعد سپورٹس کونسل کے سپرد کیا گیا۔ذرائع نے بتایا کہ شمالی کشمیر میں ضلعی انتظامیہ نے غیر قانونی تجاوزات اور سٹیٹ لینڈ کو باز یاب کرنے کی خاطر بڑے پیمانے پر مہم شروع کی ہے۔
معلوم ہوا ہے کہ انتظامیہ نے پہلے ہی نوٹس جاری کی جس میں بتایا گیا جن لوگوں نے سرکاری اراضی پر قبضہ کیا ہے وہ از خود قبضے کو چھوڑے بصورت دیگر قانونی کارروائی کے لئے تیار ہے۔ذرائع نے بتایا کہ جموں وکشمیر انتظامیہ نے محکمہ مال کے عہدیداروں کو ہدایت دی کہ وہ یوٹی میں انسداد تجاوزات مہم میں مزید شدت لاکر غیر قانونی تجاوزات کو منہدم کریں۔
